Janubiy Koreyada oʻzbekistonlik talabalar soni uchinchi oʻringa chiqdi

Janubiy Koreyada oʻzbekistonlik talabalar soni uchinchi pogʻonaga koʻtarildi

Oʻzbekiston Janubiy Koreyada taʼlim olayotgan xorijiy talabalar soni bo‘yicha uchinchi o‘rinni egalladi. Janubiy Koreya Taʼlim vazirligi va KEDI maʼlumotlariga ko‘ra, 2026-yil 1-aprel holatiga mamlakatda 20 876 nafar oʻzbekistonlik talaba o‘qimoqda. Bu ko‘rsatkich barcha xorijiy talabalar umumiy sonining 6,8 foiziga teng.

Oʻzbekiston bu reytingda Vyetnam (96 834 nafar) va Xitoydan (78 890 nafar) keyin uchinchi o‘rinda joylashgan. MDH davlatlari orasida esa Oʻzbekiston ancha katta farq bilan yetakchilik qilmoqda.

Janubiy Koreyada xorijiy talabalar soni ham tarixiy rekordga yetdi. 2026-yil 1-aprel holatiga ko‘ra, mamlakatdagi oliy taʼlim muassasalari, kollejlar va turli o‘quv dasturlarida jami 307 464 nafar xorijlik tahsil olgan. Bu bir yil avvalgi ko‘rsatkichdan 54 030 nafarga yoki 21,3 foizga ko‘p. Shu tariqa, Janubiy Koreyada xorijiy talabalar soni ilk bor 300 mingdan oshdi.

Immigratsiya xizmati maʼlumotlarida taʼlim va til o‘rganish maqsadida Janubiy Koreyada bo‘lib turgan Oʻzbekiston fuqarolari soni 22 179 nafar deb qayd etilgan. Bu raqamlarning taʼlim statistikasi bilan farq qilishi ikki idoraning hisoblash usullari turlicha ekani bilan izohlanadi.

Qayd etilishicha, oʻzbekistonlik yoshlar orasida Janubiy Koreyada oʻqishga qiziqish tobora ortmoqda. So‘nggi ikki yil ichida Oʻzbekistonda koreys tili o‘qitiladigan maktablar soni ikki baravardan ko‘proqqa oshgan, TOPIK imtihoniga esa bir yil davomida qariyb 50 ming kishi ro‘yxatdan o‘tgan.