Janubiy Afrikada 50 kishidan iborat olomon chet ellikni kaltaklab oʻldirdi
Shaxsi aniqlanmagan jabrlanuvchiga qilingan hujum Janubiy Afrikada shu yilda boʻlib oʻtgan migrantlarga qarshi norozilik namoyishlari toʻlqinidan keyin yuz berdi.
Janubiy Afrikada 50 kishidan iborat toda chet ellikni kaltaklab oʻldirdi
Janubiy Afrikaning Durban shahrida 50 ga yaqin kishidan iborat toda chet el fuqarosini kaltaklab oʻldirdi, deb xabar berdi politsiya.
Politsiyaning bildirishicha, yoshi 30 larning oxiri yoki 40 larning boshida deb taxmin qilingan shaxsi aniqlanmagan erkakka dastlab yoʻl chetida ikki kishi yaqinlashgan, shundan soʻng kattaroq guruh unga hujum qilgan. U voqea joyida vafot etgani maʼlum qilingan.
Politsiya qotillik yuzasidan tergov boshladi, jinoyat motivi hozircha aniqlanmagan.
Ushbu qotillik Janubiy Afrikada shu yilda yuz bergan, baʼzilari zoʻravonlikka aylanib ketgan muhojirlarga qarshi norozilik namoyishlari toʻlqinidan keyin sodir boʻldi. Shu oy boshida Durbanda va Yoxannesburg yaqinidagi Souetoda doʻkonlar va mashinalarga oʻt qoʻyilgan edi.
Viloyat politsiyasi matbuot kotibi Robert Netshiunda BBCʼga Durbandagi qotillik motivi haqida taxmin qila olmasliklarini va batafsil maʼlumotlar tasdiqlangach eʼlon qilinishini aytdi.
Hukumat namoyishchilarni tinchlikni saqlashga chaqirdi, shu bilan birga migratsiya islohotlariga ehtiyoj borligini tan oldi. Uning maʼlum qilishicha, shu yil boshida noqonuniy migratsiyaga qarshi kurash boshlanganidan beri oʻn minglab chet el fuqarolari mamlakatdan chiqarib yuborilgan yoki vataniga qaytarilgan.
Norozilik namoyishlarini tashkil etayotgan guruhlardan biri — «March and March» dastlab hamma hujjatsiz muhojirlarga Janubiy Afrikani tark etish uchun 30 iyungacha muhlat qoʻygan edi.
Ushbu muhlatgacha bir qator norozilik namoyishlari oʻtkazildi va boshqa Afrika mamlakatlaridan kelgan odamlarga hujumlar qilingani haqida xabarlar tushdi.
Ushbu hodisalar zoʻravonlik kuchayishidan xavotirga tushgan bir qancha mamlakatlarni, jumladan Zimbabve, Nigeriya va Ganani oʻz fuqarolarini vataniga qaytarishga undadi.
Nigeriya Janubiy Afrika rasmiylarini oʻsha oyda oʻz fuqarolaridan ikki kishining oʻlimida aybdor deb topdi.
Gana ham chet el fuqarolariga qarshi namoyishlar paytida Keyptaunda otib oʻldirilgan, uch farzandning otasi Bashiru Isak ismli fuqarosining oʻlimini tasdiqladi.
Uning oʻlimi Janubiy Afrika bilan diplomatik nizoga sabab boʻldi, ushbu mamlakat zoʻravonlik koʻlami oshirib koʻrsatilganini bildirdi.
«March and March» harakati yetakchilaridan biri Jasinta Ngobese-Zuma ksenofobiyani inkor etdi.
«Biz bu odamlar bilan shuncha yillar davomida birga yashay olmaymiz va endi bu juda oshirib yuborildi, yetar deyilganda, bizga ksenofobsiz deyishmoqda», — dedi u BBCʼning «Focus on Africa» dasturiga.
Janubiy Afrika deyarli yigirma yildan beri ksenofobik hujumlarga duch kelmoqda. 2008 yilda chet el fuqarolariga qarshi keng koʻlamli hujumlar paytida 60 dan ortiq kishi oʻldirilgan va oʻn minglab odamlar oʻz uylarini tark etishga majbur boʻlgan edi.
Oxirgi tartibsizliklar keng tarqalgan qashshoqlik, chuqur tengsizlik va ishchi kuchining takmilan uchdan biriga taʼsir qiladigan ishsizlik fonida yuz bermoqda.
Migrantlar koʻpincha ish oʻrinlarini tortib olishda, jinoyatchilikni avj oldirishda va davlat xizmatlariga bosim oʻtkazishda ayblanadi, garchi tadqiqotchilar bunday keng qamrovli daʼvolar dalillar bilan tasdiqlanmaganini aytishadi.
Iqtisodiy muammolariga qaramay, Janubiy Afrika ish, xavfsizlik va yaxshiroq imkoniyatlar izlayotgan migrantlar uchun qitʼadagi asosiy yoʻnalishlardan biri boʻlib qolmoqda.