ITOCHU va Deutsche Bank Oʻzbekiston Xorijiy investorlar kengashiga kirdi
Uzbekiston Prezidenti huzuridagi Xorijiy investorlar kengashi Yaponiyaning ITOCHU kompaniyasi va Deutsche Bank hisobidan oʻz tarkibini kengaytirdi hamda 2027 yil oxirigacha moʻljallangan ish rejasini tasdiqladi.
ITOCHU va Deutsche Bank Oʻzbekiston Xorijiy investorlar kengashi tarkibiga kirdi
Yaponiyaning ITOCHU korporatsiyasi va Deutsche Bank AG Oʻzbekiston Prezidenti huzuridagi Xorijiy investorlar kengashining aʼzolariga aylandi.
Yangi ishtirokchilarni aʼzolikka qabul qilish toʻgʻrisidagi qaror 4 noyabr kuni Investitsiyalar, sanoat va savdo vaziri Laziz Qudratov raisligida oʻtkazilgan Kengash Ijroiya qoʻmitasining yigʻilishida qabul qilindi.
Yigʻilish Investitsiyalar, sanoat va savdo vazirligi binosida boʻlib oʻtdi. Unda, shuningdek, Yevropa tiklanish va taraqqiyot bankning Oʻzbekistondagi vakolatxonasi rahbari Andi Aranitasi, Osiyo taraqqiyot banki vakolatxonasi direktori Kanokpan Lao-Arayya, Xalqaro moliya korporatsiyasining mintaqaviy rahbari Nil Makkeyn va Kengash Kotibiyati rahbari Aziz Gʻafurov ishtirok etdi.
Ishtirokchilar Kotibiyatning 2026 yilning dastlabki oʻn oyidagi faoliyati boʻyicha hisobotini muhokama qildilar. Xususan, gap oʻnta idoralararo guruhning faoliyati, investorlar tashabbuslarini ilgari surish, Markaziy Osiyo va Kavkaz investitsiya kengashlarining Mintaqaviy alyansini (RAIC-CAC) tashkil etish hamda biznes-assotsiatsiyalar bilan hamkorlik qilish haqida bordi.
Hozirda Kengash 15 dan ortiq mamlakatdan 40 dan ziyod kompaniya va moliya institutlarini birlashtiradi.
Yigʻilishda, shuningdek, 2027 yil oxirigacha boʻlgan ish rejasi tasdiqlandi. Unda 70 ga yaqin ishchi guruh yigʻilishlarini, 2026 yil 25 noyabr, 2027 yil 18 may va 23 noyabrda Kengashning oraliq sessiyalarini, shuningdek, 2027 yil 14–16 iyun kunlari beshinchi yalpi sessiyani oʻtkazish koʻzda tutilgan.
Bundan tashqari, RAIC-CAC yigʻilishi 2027 yil 9 aprelga Toshkentda rejalashtirilgan boʻlib, kelasi yil boshida Investment Outlook taqdimoti kutilmoqda.
Kengashning 2026 yil uchun yillik hisoboti 16 dekabr kuni FIC Year-end Session tadbirida taqdim etiladi.
Hujjatga vazirlik tomonidan oʻtkazilayotgan xorijiy investitsiyalarning Oʻzbekiston iqtisodiyotiga taʼsiri toʻgʻrisidagi 1 000 dan ortiq respondentlar oʻrtasidagi umummilliy soʻrovnoma yakunlarini kiritish rejalashtirilgan.