Istanbulda og‘ir vaziyatga tushib qolgan O‘zbekiston fuqarolari vatanga qaytarildi

Istanbulda qiyin ahvolga tushib qolgan O‘zbekiston fuqarolari o‘z yurtlariga qaytarildi. Bu haqda O‘zbekiston Respublikasining Istanbuldagi Bosh konsulxonasi ma’lum qildi.

Bosh konsulxona xabariga ko‘ra, Turkiyada og‘ir ijtimoiy-moliyaviy vaziyatga tushib qolgan A.A. va B.D. ismli fuqarolarning holati o‘rganilgan. Tekshiruv natijasida ularning shaxsiy hujjatlari, xususan, fuqarolik pasportlarini uchinchi shaxslarga berib yuborganliklari sababli hujjatsiz qolganliklari aniqlangan.

Mazkur holat yuzasidan Migratsiya agentligi bilan hamkorlikda ushbu fuqarolarga zarur konsullik va tashkiliy yordam ko‘rsatilib, ularning O‘zbekistonga qaytishi uchun aviachiptalar xarid qilib berilgan.

Bosh konsulxona o‘z xabarida fuqarolarni ogohlantirib, "Har qanday holatda ham fuqarolik pasportlarini boshqa shaxslarga bermang, hujjatlarni ehtiyot qiling va ulardan faqat qonuniy maqsadlarda foydalaning", deya ta’kidladi.

Avvalroq, 2026-yilning dastlabki yetti oyi davomida xorijda murakkab vaziyatga tushib qolgan jami 2 888 nafar O‘zbekiston fuqarosi Migratsiya agentligi tomonidan vatanga qaytarilgani xabar qilingan edi. Bu maqsadlar uchun Migratsiya jamg‘armasidan umumiy 9 milliard 936 million so‘m mablag‘ sarflangan.