Istanbulda adashib masjidga kelib qolgan 13 yoshli o‘zbekistonlik qiz onasiga topshirildi
Istanbulda yo‘qolib qolgan 13 yoshli o‘zbekistonlik qiz onasiga qaytarildi.
O‘zbekistonning Istanbuldagi Bosh konsulxonasi 13 yoshli O‘zbekiston fuqarosi S.J.ni onasiga topshirdi.
Ma’lum qilinishicha, 30-avgust kuni soat 22:30 da Beyo‘g‘lu tumanidagi masjidlardan birining imomi Bosh konsulxonaga qo‘ng‘iroq qilib, voyaga yetmagan O‘zbekiston fuqarosi haqida xabar bergan.
Konsulxona diplomatlari zudlik bilan voqea joyiga yetib borib, bolani Bosh konsulxonaga olib kelishgan va uning yaqin qarindoshlarini topish hamda ular bilan bog‘lanish choralarini ko‘rishgan.
1-sentyabr kuni S.J. onasiga sog‘-salomat topshirildi. Bosh konsulxona ushbu masalada yordam ko‘rsatgan Turkiyaning tegishli idoralari va fuqarolariga minnatdorlik bildirdi.
Iyul oyida Turkiyaning Mug‘la shahrida daryoga cho‘kib ketgan O‘zbekiston fuqarosining jasadi topilgani haqida xabar berilgan edi. 21 yoshli o‘zbekistonlik yigit Seydikemer tumanidagi daryoga cho‘milish uchun borgan.
Voqea joyida o‘tkazilgan tekshiruvlardan so‘ng jasad autopsiya uchun morgga olib ketilgan. Hozirda holat yuzasidan tergov harakatlari olib borilmoqda.