Isroil Niderlandiya sanksiyalariga diplomatik chora bilan javob berdi
Isroil Niderlandiyaning Ramallohdagi vakolatxonasi xodimlariga bergan diplomatik maqomini bekor qilishini eʼlon qildi. Bu qaror Niderlandiyaning Gʻarbiy sohil, Sharqiy Quddus va Joʻlon tepaliklaridagi Isroil aholi punktlarida ishlab chiqarilgan mahsulotlar importini taqiqlashiga javoban qabul qilindi.
Isroil Niderlandiya sanksiyalariga diplomatik javob qaytardi
Reutersning 27-sentabr kuni bergan xabariga ko‘ra, Isroil Tashqi ishlar vazirligi mamlakat rasmiylari tomonidan akkreditatsiya qilingan niderlandiyalik diplomatlarning maqomini bekor qilgan. Ularning diplomatik maqomi yetti kundan keyin kuchini yo‘qotadi.
Isroil tashqi ishlar vaziri Gideon Saar X ijtimoiy tarmog‘ida qarorga izoh berib, Niderlandiya falastinliklar bilan munosabatlarda o‘z manfaatlarini bildirishda davom etishi mumkinligini, biroq buni Isroil hududidan amalga oshirmasligi kerakligini aytgan.
«Agar Niderlandiya falastinliklar oldida o‘z manfaatlarini ifoda etishni davom ettirmoqchi bo‘lsa, buni Isroil davlati hududidan emas, Falastin muxtoriyati hududidan amalga oshirishi mumkin», - deb yozgan Saar.
Taqiq shaxsiy bagaj va suvenirlarga ham tegishli
Xabarga ko‘ra, 22-sentabrdan boshlab Niderlandiya, shuningdek, Buyuk Britaniya, Fransiya, Kanada, Daniya va boshqa bir qator davlatlar G‘arbiy sohil, Jo‘lon tepaliklari hamda Sharqiy Quddusdagi Isroil aholi punktlariga qarshi sanksiyalar joriy etgan.
Import taqiqi ushbu aholi punktlaridan olib kiriladigan barcha mahsulotlarga, jumladan, sayohatchilarning shaxsiy bagajidagi buyumlar va suvenirlarga ham tatbiq etiladi.
Niderlandiya bojxona idoralari izohiga ko‘ra, tovarning kelib chiqish joyi uning qayerda sotib olingani yoki ishlab chiqarilganiga qarab belgilanadi. Shu sababli cheklov Isroildan olib kelinadigan barcha mahsulotlarga emas, aynan shu aholi punktlarida xarid qilingan yoki ishlab chiqarilgan tovarlarga taalluqlidir.
The Times of Israel nashri suhbatlashgan yo‘lovchilar Amsterdam aeroportida bagaj tekshiruvlari avvalgidan ham sinchkovroq o‘tkazilayotganini aytgan.
Isroil 1967-yildagi Olti kunlik urush vaqtida, undan oldin Iordaniya anneksiya qilgan Iordan daryosining G‘arbiy sohili ustidan nazorat o‘rnatgan.
Keyingi o‘n yilliklarda Isroil bu hududda o‘nlab aholi punktlarini barpo etgan. Xabarda aytilishicha, ularda qariyb 500 ming yahudiy yashaydi. G‘arbiy sohildagi falastinliklar soni esa taxminan 3 million kishini tashkil etadi.