Isroil harbiylari Suriya janubiga tahdidli varaqalar tashladi
Isroil harbiylari Suriya janubiga tahdidli varaqalar tashladi.
Isroil armiyasi Suriyaning janubiy Deraa va Qunaytra viloyatlari orasidagi Yarmuk daryosi hududiga samolyotlardan tahdidli varaqalar tashladi. Bu hududda Isroil qo‘shinlari o‘z bosqinini va harbiy ishtirokini kengaytirmoqda. Bu haqda Anadolu agentligi xabar berdi.
Mahalliy manbalarga ko‘ra, bu voqea aholi Isroil qo‘shinlarining Suriya hududiga kirishiga to‘sqinlik qilish maqsadida yo‘llarni toshlar bilan to‘sib qo‘yganidan so‘ng sodir bo‘lgan.
Varaqalarda Isroil armiyasiga qarshi barcha harakatlarni, jumladan, yo‘llarni toshlar bilan to‘sishni to‘xtatish talab qilingan. Shuningdek, harbiylar mintaqadagi faoliyatini mavjud barcha vositalardan foydalangan holda davom ettirishi haqida ogohlantirilgan.
Isroil armiyasi Deraa va Qunaytrada muntazam ravishda reydlar va tintuvlar o‘tkazib, nazorat-o‘tkazish punktlarini o‘rnatmoqda va tinch aholini qo‘lga olmoqda. Bunga javoban Deraa aholisi Isroil qo‘shinlariga ogohlantirish berdi: "Xavfsizligingiz uchun kirish taqiqlanadi. Biz o‘z yerimizni bor kuchimiz bilan himoya qilamiz".
2024-yilda Suriyada Bashar Asad rejimi ag‘darilganidan so‘ng, Isroil 1974-yildagi Kuchlarni ajratish to‘g‘risidagi bitimni buzgan holda Deraa va Qunaytraning bosib olingan hududlarida harbiy postlar o‘rnatdi. O‘shandan beri u yerda 50 dan ortiq kishi qo‘lga olingan.
Ayni paytda, Suriya prezidenti Ahmad ash-Shara’a mamlakati Isroil bilan bir qator davlatlar vositachiligida xavfsizlik bo‘yicha kelishuvga erishish ustida ishlayotganini ma’lum qildi. Uning aytishicha, mazkur kelishuv kelajakda tomonlar o‘rtasida keng qamrovli tinchlik o‘rnatishga zamin yaratishi mumkin.
Prezidentning ta’kidlashicha, Suriya Isroil bilan har qanday to‘qnashuvdan qochmoqda va xavfsizlik kelishuvi inqirozni yanada kengroq va har tomonlama hal etishga yo‘l ochishi mumkin. Shu bilan birga, u bunday kelishuv Suriyaning Isroil tomonidan bosib olingan Golan tepaliklariga bo‘lgan da’vosidan voz kechishini anglatmasligini ta’kidladi.