“Isroil Eronga javob qaytarishga tayyor” – Kats

Kats: "Isroil Eronga javob qaytarishga shay"

Isroil mudofaa vaziri Isroil Kats 2-sentyabr kuni Eron hujum qilgan taqdirda, Isroil katta kuch bilan javob berishga tayyorligini ma’lum qildi. Bu bayonot Eron kuchlari mintaqadagi AQSH harbiy pozitsiyalariga zarba berganidan so‘ng yangradi.

Isroil Katsning ta’kidlashicha, Isroil kuchlari sentyabr o‘rtalarida boshlanadigan muhim yahudiy bayramlari paytida Eron tomonidan bo‘lishi mumkin bo‘lgan hujumga tayyor turibdi.

"Hozircha ular Isroildan tashqari butun mintaqa bo‘ylab zarba bermoqda. Ammo ularning bizga hujum qilish ehtimoli bor. Biz bunga mudofaa nuqtayi nazaridan tayyormiz", dedi u Isroil OAVga.

"Agar Eron hujum qilsa, Isroil to‘g‘ridan-to‘g‘ri, juda katta kuch bilan javob beradi", deya qo‘shimcha qildi Kats.

U, shuningdek, samolyotlar havoga ko‘tarilishga tayyor ekanini bildirdi.

Eron 2-sentyabrga o‘tar kechasi Amerikaning keng ko‘lamli bombardimonidan so‘ng Yaqin Sharqdagi AQSH obyektlariga ketma-ket hujumlar uyushtirdi.

Isroil AQSH bilan birga fevral oyi oxirida Eronga qarshi urush boshlagan edi. Biroq prezident Donald Tramp aprel oyida mo‘rt sulhga erishganidan beri Tel-Aviv harbiy jihatdan chetda turibdi.

"Ular yahudiy bayramlarida hujum qilishni yaxshi ko‘radi, chunki yahudiylarni yomon ko‘radi. O‘tmishda sodir bo‘lgan ko‘plab voqealarga e’tibor bering. Lekin biz mudofaa va hujum borasida AQSH bilan hamkorlikda tayyorgarlik ko‘rib qo‘yganmiz", dedi Kats.

Eron rahbarlari Isroilga keskin qarshi va HAMAS kabi qurolli guruhlarni qo‘llab-quvvatlaydi. Lekin Eron hukumati konstitutsiyaga ko‘ra mamlakatdagi minglab kishilardan iborat yahudiylar jamoasini rasman tan oladi.

Isroil urushning dastlabki bosqichida Eronning oliy rahnamosi Oyatulloh Ali Xomanaiyni o‘ldirgan edi. Eron neftga boy Fors ko‘rfaziga kirish yo‘li hisoblangan Hormuz bo‘g‘ozidagi tijorat kemalariga hujum qilgach, AQSH va Eron o‘rtasidagi sulh buzildi. Tehron bu bo‘g‘ozni o‘zining asosiy bosim vositasi deb biladi.