Ispaniyada minglab odamlar “pomidorlar jangi” festivalida qatnashdi

Ispaniyada minglab kishilar "pomidorlar jangi" festivalida ishtirok etdi.

Ispaniyaning sharqiy qismidagi Bunol shahrida an'anaviy La Tomatina festivali bo'lib o'tdi. Unda 20 mingdan ortiq odam ko'chalarda bir-biriga pomidor otib, "pomidorlar jangi"da qatnashdi.

Festival davomida yuk mashinalari shahar tor ko'chalariga 165 tonna pomidor yetkazib berdi. Taxminan bir soat davom etgan jangda ishtirokchilarning aksariyati oq futbolka kiygan bo'lib, ularning kiyimlari pushti va qizil rangga bo'yaldi. Tadbir oldidan binolar himoya qoplamalari bilan yopildi, xavfsizlikni ta'minlash uchun politsiya xodimlari jalb qilindi.

Har yili avgust oyining so'nggi chorshanbasida o'tkaziladigan La Tomatina festivali 1945-yilda mahalliy oziq-ovqat jangi sifatida boshlangan va keyinchalik Ispaniyaning eng mashhur yozgi tadbirlaridan biriga aylangan. So'nggi yillarda ishtirokchilarning qariyb 40 foizini xorijiy sayyohlar tashkil etmoqda. Ayniqsa, 2011-yilda La Tomatina tasvirlangan "Zindagi Na Milegi Dobara" filmi namoyish etilgach, Hindistondan keladigan sayyohlar soni sezilarli darajada oshgan.

Festivalning asosiy qoidasi — pomidorni boshqa ishtirokchiga otishdan avval uni ezish. Bu jarohatlarning oldini olish uchun belgilangan. Ba'zi ishtirokchilar ko'z va quloqlarini himoya qilish uchun maxsus ko'zoynak va quloq tiqinlaridan foydalanadi. Bir soat tugagach, to'p ovozi festival yakunlanganini bildiradi, shundan so'ng ishtirokchilar maxsus joylarda yuvinadi, shahar ko'chalari esa suv bilan tozalanadi.