Irlandiya hukumati vaziri zoʻravonlikka qarshi kurashish inqiroz markazining rozilik haqidagi reklamasini tanqid qildi

Irlandiya adliya vaziri Zoʻrlash oqibatlarini bartaraf etish boʻyicha inqiroz markazining rozilik haqidagi reklamasini tanqid qildi

Irlandiya adliya vaziri Dublin zoʻrlash oqibatlarini bartaraf etish boʻyicha inqiroz markazi (DRCC) tomonidan rozilikni targʻib qilish maqsadida yaratilgan reklamani qoralab, uni "buvi va bobolar uchun nooʻrin va tahqirli" deb taʼrifladi.

Reklamada buvi va boboning yosh bolani jon-dili bilan quchoqlayotgani, ular nabira qizga oʻgirilganda esa qizning norozi boʻlib turgani koʻrsatilgan. Unda shunday yozuv bor: "hamma ham quchoqlanishni xohlamaydi. Hatto oʻzlarini yaxshi koʻradigan insonlar tomonidan boʻlsa ham".

Allaqachon olib tashlangan ushbu reklama tanqidlarga sabab boʻldi va New York Post kabi nashrlarni oʻz ichiga olgan xalqaro ommaviy axborot vositalari eʼtiborini tortib, keng muhokama qilindi.

Boʻlimi ushbu kampaniyani moliyalashtiradigan «Fianna Fáil» partiyasi siyosatchisi Jim O'Kallagan video DRCC bilan muloqotdan soʻng olib tashlanganini aytdi.

Uning taʼkidlashicha, video "Hukumat qarashlarini ifodalamaydi".

"Bu video buvi va bobolar uchun ham nooʻrin, ham tahqirli edi va rasmiylarimning ular bilan muloqotidan soʻng DRCC tomonidan olib tashlandi.

Jinsiy munosabatlarga kelganda odamlarning rozilik tushunchasini anglashini taʼminlash juda muhim boʻlsa-da, bu video ushbu maqsadga xizmat qilmadi va koʻp jihatdan aks natija berdi."

Video DRCC tomonidan olib borilayotgan 'We-Consent' («Biz rozimiz») nomli kampaniyaning bir qismi edi.

Irlandiyaning RTÉ teleradiokompaniyasiga bergan bayonotida DRCC shunday dedi: "We-Consent — bu Dublin zoʻrlash oqibatlarini bartaraf etish boʻyicha inqiroz markazining profilaktika ishlari doirasidagi uzoq muddatli kampaniya boʻlib, Irlandiyada rozilik haqidagi xabardorlikni va unga amal qilishni oshirishga qaratilgan.

Biz shaxsiy chegaralarni yoshlikdan hurmat qilish va boshqalarning chegaralarini ham hurmat qilish gʻoyasiga asoslangan uchta video yaratdik.

Ushbu videolar biz kutgan ijobiy taʼsirni koʻrsatyaptimi-yoʻqmi, shu haqda oʻylab koʻrayotganimizda, ularni ijtimoiy tarmoqlardagi sahifalarimizdan olib tashlaymiz."

'We-Consent' kampaniyasi Adliya vazirligi bilan bir qatorda, Bolalar, tenglik, nogironlik, integratsiya va yoshlar ishlari vazirligi hamda CUAN (Oilaviy, jinsiy va jinsga asoslangan zoʻravonlikga qarshi agentlik) tomonidan ham qoʻllab-quvvatlanadi.

Ushbu uchta tashkilotning barchasiga izoh olish uchun murojaat qilingan.

«Fine Gael» senatori Garet Skahill ushbu video resurslardan notoʻgʻri foydalanish ekanini aytdi.

"Bu yerda tashvishli narsa shundaki, davlat mablagʻlari eng yaxshi holatda yaxshi oʻylanmagan, eng yomon holatda esa haqoratli va keksa aholimizga zarar yetkazishi mumkin boʻlgan reklamani moliyalashtirishga sarflangan", dedi u.

"Rozilik masalasi juda jiddiy va men Zoʻrlash oqibatlarini bartaraf etish boʻyicha inqiroz markazi va boshqa agentliklar har kuni zoʻrlash va jinsiy zoʻravonlikning sitamdiydalari, shu jumladan bolalar manfaatlarini himoya qilish uchun olib borayotgan muhim ishlarni eʼtirof etaman.

Biroq davlat tomonidan moliyalashtirilgan ushbu ijtimoiy tarmoq videosi maqsaddan mutlaqo yiroqdir."

U soʻzida davom etdi: "Keyin chi? Ushbu Rojdestvoda oila aʼzolarimiz bilan koʻrishishdan oldin Dublin, Shennon, Nok va Kork aeroportlarining kutib olish zallarida rozilik shakllarini imzolashimiz kerak boʻladimi?"