Inson hayotining qaysi davrida o‘zini eng baxtli his qiladi?

Inson o‘zini hayotining qaysi bosqichlarida eng baxtli his qiladi?

Olimlar tomonidan o‘tkazilgan tadqiqot natijalariga ko‘ra, inson hayotida 23 va 69 yoshlar baxt hissi eng yuqori cho‘qqiga chiqadigan davrlar hisoblanadi. Bu xulosaga 17 yoshdan 85 yoshgacha bo‘lgan 23 ming nafar ishtirokchining ma’lumotlarini tahlil qilish orqali kelingan. Tadqiqot davomida ishtirokchilar har besh yilda bir marta so‘rovdan o‘tkazilib, ularning turli hayot bosqichlaridagi hayotdan qoniqish darajasi baholangan.

**Baxtning ikki cho‘qqisi**

Tadqiqotga ko‘ra, baxtning birinchi cho‘qqisi taxminan 23 yoshda kuzatiladi. Bu davrda inson yosh, kuch-g‘ayratga to‘la bo‘ladi va oldida cheksiz imkoniyatlar turgandek tuyuladi. Odatda bu yoshda katta mas’uliyatlar hali unchalik ko‘p bo‘lmaydi, kasbiy faoliyat esa endigina boshlanadi. O‘zini namoyon etish, yangi tajribalar orttirish va yangi insonlar bilan tanishish istagi hayotdan zavqlanish hissini kuchaytiradi.

Ikkinchi baxt cho‘qqisi esa odatda 69 yosh atrofida kuzatiladi. Bu davrga kelib ko‘pchilik nafaqaga chiqadi va o‘ziga ko‘proq vaqt ajratish imkoniga ega bo‘ladi. Mehnat faoliyati yakunlangach, odamlar hayotdagi ustuvorliklarini qayta ko‘rib chiqib, oilasi, sevimli mashg‘ulotlari va ilgari vaqt topa olmagan qiziqishlariga e’tibor qaratadi. Farzandlar mustaqil hayot kechira boshlagani, kundalik tashvishlar kamaygani sababli inson oddiy quvonchlarni ko‘proq qadrlaydi va hayotiga mamnunlik bilan nazar tashlaydi.

**Nega yoshi ulg‘aygan sayin baxt hissi ortadi?**

Psixologlarning ta’kidlashicha, yoshi ulg‘aygan sari inson hayotga boshqacha nigoh bilan qaray boshlaydi. U kundalik hayotdagi oddiy lahzalar va kichik quvonchlarni ko‘proq qadrlaydi. Tashqi yutuqlardan ko‘ra ichki xotirjamlik va ruhiy qoniqishga e’tibor qaratish esa hayotdan mamnunlik hissini oshiradi.

**Baxtga nimalar ta’sir qiladi?**

Mutaxassislar yetuk yoshdagi baxt hissiga mustahkam ijtimoiy aloqalar, qiziqishlar va faol turmush tarzi katta ta’sir ko‘rsatishini ta’kidlaydi. Tadqiqotlar sog‘lom odatlarga amal qiladigan va yaqinlari bilan muntazam muloqotda bo‘ladigan insonlar hayotdan ko‘proq qoniqishini ko‘rsatgan.