Infografika: 2026-yilda eng ko‘p hududi yongan davlatlar
2026-yil 1-avgust holatiga ko‘ra, dunyo bo‘ylab o‘rmon va landshaft yong‘inlari qamrab olgan maydon 112,3 million gektarga yetdi. Eng katta ko‘rsatkich Kongo Demokratik Respublikasida qayd etilgan - bu yerda 13,6 million gektar maydon yongan.
Infografika: 2026-yilda eng ko‘p hududi yongan davlatlar
Global Wildfire Information System (GWIS) ma’lumotlariga asoslangan infografikaga ko‘ra, 2026-yil boshidan 1-avgustga qadar dunyo bo‘ylab jami 112,3 million gektar maydon yong‘inlar ta’siriga uchragan. Bu Janubiy Afrika Respublikasi hududiga teng maydonni tashkil etadi.
Ushbu statistikaga faqat nazoratdan chiqqan tabiiy yong‘inlar emas, balki qishloq xo‘jaligi yerlarini yoqish va rejalashtirilgan boshqariladigan yoqish ishlari ham kiritilgan.
**Yong‘inlar maydonining yarmidan ko‘pi Afrikaga to‘g‘ri keladi**
2026-yil boshidan buyon dunyoda yongan maydonlarning yarmidan ko‘pi Afrika qit’asi hissasiga to‘g‘ri kelgan. Ayniqsa, Sahroi Kabirdan janubda joylashgan mamlakatlarda yerlarni tozalash, yaylovlarni boshqarish va dalalarni ekishga tayyorlash maqsadida mavsumiy yoqish amaliyoti keng tarqalgan.
Mamlakatlar orasida Kongo Demokratik Respublikasi 13,6 million gektar yongan maydon bilan birinchi o‘rinda turadi. Bu taxminan Angliya hududiga teng. Keyingi o‘rinlarni Angola (7,5 million gektar), Janubiy Sudan (7 million gektar) va Markaziy Afrika Respublikasi (6 million gektar) egallagan.
**Avstraliya dunyoda ikkinchi o‘rinda**
Afrikadan tashqari eng katta yongan maydon Avstraliyada qayd etilgan bo‘lib, u 11,8 million gektarni tashkil etadi. Bu ko‘rsatkich bilan Avstraliya Kongo Demokratik Respublikasidan keyin dunyoda ikkinchi o‘rinda turadi. Shuningdek, Okeaniyadagi yongan maydonlarning deyarli barchasi Avstraliya hissasiga to‘g‘ri keladi. Umuman olganda, Okeaniya dunyoda yong‘inlar qamrab olgan maydonning qariyb 11 foizini tashkil etadi.
**Osiyoda Myanma yetakchi**
Osiyo hissasiga dunyo bo‘ylab yongan yerlarning taxminan 18 foizi to‘g‘ri kelgan. Qit’ada Myanma 4,3 million gektar bilan birinchi o‘rinni egallagan. Hindistonda 4 million gektar maydon yongan. Tailand, Laos va Xitoyda esa yong‘inlar qamrab olgan maydon har bir mamlakatda 2,3 milliondan 2,7 million gektargacha bo‘lgan.
**AQSh va Kanadada ham yirik yong‘inlar kuzatildi**
Kanadada 1-avgustga qadar qariyb 2 million gektar maydon yongan. Yong‘inlar mamlakatning bir nechta provinsiyalarida davom etgan. AQShda esa yongan maydon 2,4 million gektarga yetgan. Ayniqsa, Oregon va Vashington shtatlarida yirik o‘rmon yong‘inlari kuzatilgan. Avgust boshida mamlakat bo‘ylab bir vaqtning o‘zida 100 dan ortiq yirik yong‘in faol bo‘lgan. Uzoq yillik statistika AQShda yong‘inlar soni kamayib borayotgan bo‘lsa-da, ular qamrab olayotgan umumiy maydon kengayib borayotganini ko‘rsatmoqda.
**Yevropada asosiy ulush Rossiya hissasiga to‘g‘ri keldi**
Yevropa hissasiga dunyoda yongan maydonlarning qariyb 3 foizi to‘g‘ri kelgan. Qit’adagi asosiy ko‘rsatkich Rossiya hissasiga to‘g‘ri kelib, yong‘inlar qariyb 3,3 million gektar hududni qamrab olgan. Ispaniyada esa ekstremal issiq va qurg‘oqchilik sabab 1-avgustga qadar qariyb 180 ming gektar maydon yongan. Avila provinsiyasidagi yong‘in mamlakat tarixidagi eng yirik yong‘inga aylangan. Shu davrda Fransiyada ham yirik yong‘inlar kuzatilgan. Ispaniya va Fransiyada yong‘inlar tufayli evakuatsiya qilinganlar soni jami 300 ming kishidan oshgan.
**Janubiy Amerikada Venesuela birinchi**
Janubiy Amerika hissasiga jahondagi yongan maydonlarning qariyb 7 foizi to‘g‘ri kelgan. Mintaqada Venesuela 3 million gektar bilan birinchi o‘rinni egallagan. Braziliyada esa yong‘inlar 2 million gektar maydonni qamrab olgan.
Mutaxassislar yongan maydon hajmining o‘zi yong‘inlarning xavfliligi yoki kuchini to‘liq aks ettirmasligini ta’kidlaydi. Chunki GWIS statistikasiga tabiiy yong‘inlar bilan birga qishloq xo‘jaligi va boshqa maqsadlarda rejali ravishda amalga oshirilgan yoqishlar ham kiritilgan.