Infantinoga qarshi ittifoq: UEFA va KONKAKAF jamoalari bir turnirda ishtirok etishi mumkin — The Guardian
Infantinoga qarshi yangi ittifoq: UEFA va KONKAKAF terma jamoalari yagona turnirda birlashishi mumkin – The Guardian
Yevropa futbol assotsiatsiyalari ittifoqi (UEFA) va Shimoliy, Markaziy Amerika hamda Karib havzasi futbol konfederatsiyasi (KONKAKAF) Xalqaro futbol federatsiyasi (FIFA) prezidenti Janni Infantinoga qarshi qaratilgan harakat sifatida qo‘shma Millatlar Ligasini tashkil etish imkoniyatini muhokama qilmoqda.
Bu tashabbus Infantinoning Jahon chempionati translyatsiya huquqlarining bir qismini sotish taklifi ortidan yuzaga kelmoqda.
Ma’lumotlarga ko‘ra, ushbu yangi turnirda UEFA va KONKAKAFga a’zo jami 96 ta terma jamoa ishtirok etishi mumkin. Yangilangan Millatlar Ligasining birinchi mavsumi 2028-yilda boshlanishi kutilmoqda. Uning formati quyidagicha bo‘lishi rejalashtirilgan: kuzda guruh bosqichi, mart oyida pley-off o‘yinlari va iyun oyida final bosqichi o‘tkaziladi.
Turnir har ikki yilda bir marta tashkil etiladi va uning yangi tuzilmasi amaldagi formatga o‘xshash bo‘ladi: terma jamoalar ligalarga bo‘linadi. Masalan, "A" ligasida Yevropadan Ispaniya, Angliya, Fransiya va Germaniya, Shimoliy Amerikadan esa AQSh, Meksika va Kanada kabi jamoalar ishtirok etishi mumkin.
Hozirda har ikki konfederatsiyada Millatlar Ligasi o‘yinlari terma jamoalar uchun ajratilgan bir xil FIFA kunlarida o‘tkaziladi. Bu holat yangi turnirni tashkil etish jarayonini soddalashtirishi mumkin.
Biroq, tashkilotdagi umumiy vaziyatni hisobga olgan holda, FIFA ushbu turnirni tasdiqlaydimi yoki yo‘qmi, hozircha noma’lum.