Ilon Mask SpaceX aktsiyalari oʻsishidan keyin dunyoning eng boy odami maqomini qaytarib oldi

Ilon Mask SpaceX aktsiyalari oʻsishi ortidan yana dunyoning eng boy odamiga aylandi

Ilon Maskning boyligi SpaceX va Tesla aktsiyalari oʻsishi tufayli yana 1 trillion dollardan oshdi. Shu tariqa, tadbirkor dunyoning eng boy odami maqomini qaytarib oldi, u ushbu maqomga ilk bor iyun oyida SpaceX birjaga chiqqanidan keyin erishgan edi.

Forbes baholashiga koʻra, 5 oktyabr kuni ertalab Maskning boyligi bir kunda 30,6 milliard dollarga koʻpayib, 1 trillion dollarga yetdi. Reytingda ikkinchi oʻrinni 371,5 milliard dollar boylik bilan Amazon asoschisi Jeff Bezos egallab turibdi.

5 oktyabrdagi savdolar boshida SpaceX aktsiyalari 5 foizdan koʻproqqa oshib, bir aktsiya uchun 167 dollarni tashkil etdi. Tesla kotirovkalari ham 1 foizdan koʻproqqa koʻtarildi.

SpaceX aktsiyalarining oʻsishi Morgan Stanley tahlilchilari kompaniya qimmatli qogʻozlari bahosi pasaytirilgan boʻlishi mumkinligini aytganidan keyin yuz berdi. Oʻtgan haftada Starship raketasining orbitaga muvaffaqiyatli uchirilishi ham qoʻshimcha omil boʻldi.

Tesla aktsiyalarini esa, oʻz navbatida, uchinchi chorakdagi avtomobillarni yetkazib berish haqidagi maʼlumotlar qoʻllab-quvvatladi. Koʻrsatkichlar tahlilchilar kutganidan yuqori boʻldi va faqat juma kunining oʻzida Maskning boyligini taxminan 61 milliard dollarga oshirishga yordam berdi.

Mask ilk bor iyun oyida Nasdaq birjasida SpaceX aktsiyalari savdosi boshlanganidan keyin trillionerga aylangan edi, biroq bir necha kundan keyin SpaceX va Tesla kotirovkalari tushishi sababli bu maqomini yoʻqotgandi. Soʻnggi haftalarda ikkala kompaniya aktsiyalari oʻsishi fonida uning boyligi yana 1 trillion dollarlik belgiga yaqinlashib qolgan edi.

Forbes baholashiga koʻra, Mask boylik miqdori boʻyicha oʻzidan keyingi oʻrinda turgan Jeff Bezosni sezilarli darajada ortda qoldirib, dunyoning eng boy odami boʻlib qolmoqda.