«Iks odamlar» yulduzi Patrik Styuart 86 yoşida vafot etdi

«Iks odamlar» yulduzi Patrik Styuart 86 yoshida vafot etdi

Aktyorning oilasi ijtimoiy tarmoqlarda eʼlon qilgan bayonotda Styuart so‘nggi paytlarda Alsgeymer kasalligi va Levi tanachalari bilan bog‘liq demensiyadan aziyat chekkanini aytgan. Uning so‘nggi kunlarida rafiqasi va yaqinlari yonida bo‘lgan.

Patrik Styuart 1940-yilda Angliyaning G‘arbiy Yorkshir grafligida tug‘ilgan. U aktyorlik faoliyatini yoshligidan boshlagan va 1966-yilda nufuzli Qirollik Shekspir teatri truppasiga qo‘shilgan.

Unga jahon miqyosidagi shuhratni «Yulduzli yo‘l: Keyingi avlod» serialidagi kapitan Jan-Lyuk Pikar roli olib kelgan. Keyinchalik aktyor «Iks odamlar» filmlarida professor Charlz Ksavyer obrazini gavdalantirib, yanada keng auditoriyaga tanilgan.

2010-yilda Buyuk Britaniya qirolichasi Yelizaveta II Styuartni ritsarlik unvoni bilan taqdirlagan.

Styuart aktyorlikdan tashqari ijtimoiy masalalardagi faolligi bilan ham tanilgan. U oilaviy zo‘ravonlik muammosiga va urush faxriylarining ruhiy salomatligiga jamoatchilik e’tiborini qaratishga harakat qilgan. Shuningdek, qochoqlarni qo‘llab-quvvatlagan va hayvonlar huquqlarini himoya qilgan.

«Yulduzli yo‘l»da kapitan Jeyms Kirk rolini ijro etgan kanadalik aktyor va yozuvchi Uilyam Shetner hamkasbining vafoti munosabati bilan X ijtimoiy tarmog‘ida hamdardlik bildirgan.

«Ser Patrik Styuart do‘st, hamkasb va ajoyib aktyor edi. Teatr sahnasidan tortib “Enterprayz” kemasining kapitanlik ko‘prigigacha u aql-zakovat, nafosat va chuqur insoniylikni namoyon etdi», - deb yozgan Shetner.

Uning ta’kidlashicha, kapitan Pikar insondagi eng yaxshi fazilatlarni o‘zida mujassam etgan va bu obrazni yaratgan Styuartning o‘zi ham shunday inson bo‘lgan. Shetner marhumga va uning ijodiga cheksiz mehr hamda hurmat bilan qaraganini bildirgan.