Ijtimoiy himoya agentligi fuqarolarning Ijtimoiy reyestrdan chiqarilishiga izoh berdi
Ijtimoiy himoya agentligi fuqarolarning Ijtimoiy reyestrdan chiqarilishiga munosabat bildirdi
Milliy ijtimoiy himoya agentligi ijtimoiy tarmoqlarda fuqarolarning Ijtimoiy reyestrdan chiqarilishi bilan bogʻliq muhokamalar fonida rasmiy bayonot berdi.
Idora oilaning reyestrdan chiqarilishining oʻzi qashshoqlikning avtomatik ravishda kamayganini anglatmasligini, bunday qarorlar esa belgilangan reja yoki koʻrsatkichlarni bajarish uchun qabul qilinmasligi kerakligini taʼkidladi.
Agentlik xabariga koʻra, Ijtimoiy reyestrning asosiy maqsadi — muhtoj fuqarolarni aniqlash, ularni ijtimoiy himoya bilan qamrab olish va zarur yordam koʻrsatishdir. Shu bilan birga, muayyan hududlardagi qashshoqlik darajasi Jahon banki metodologiyasi asosida oʻtkaziladigan soʻrovnomalar natijalariga koʻra belgilanadi. Reyestrdan chiqarish faqat oilaning ijtimoiy-iqtisodiy ahvoli haqiqatda yaxshilanganda va u belgilangan mezonlarga javob bergandagina amalga oshirilishi lozim.
Qoidalarga rioya etilishini nazorat qilish maqsadida Agentlik huzuridagi Ijtimoiy himoya inspektsiyasi reyestrdan chiqarilgan oilalar yuzasidan tekshiruvlar oʻtkazib, qabul qilingan qarorlar belgilangan meʼyorlarga muvofiqligini oʻrganmoqda. Idoraning maʼlum qilishicha, asosiy vazifa fuqarolarni hisobga olish tizimidan rasmiyatchilik uchun chiqarish emas, balki oilalarni qashshoqlikdan haqiqatda olib chiqish va muhtojlarning ijtimoiy qoʻllab-quvvatlanishga boʻlgan huquqlarini taʼminlashdan iborat.