Huquq himoyasi tashkiloti Vyetnamni avstraliyalik va norvegiyalik faollarni oʻgʻirlab ketganlikda ayblamoqda
Vyetnam bu erkaklar mamlakatga noqonuniy ravishda kirganini maʼlum qildi va ularni terrorchilik faoliyatini rejalashtirishda aybladi.
Huquq himoyachilari guruhi Vyetnamni avstraliyalik va norvegiyalik faollarni oʻgʻirlab ketganlikda ayblamoqda
Nguyen Dik Txuan (chapda) va Chan Xiyep Vyetnamda hibsda ushlab turilibdi, demokratiya tarafdori boʻlgan guruh buni "transmilliy qatagʻon" harakati deb taʼrifladi
Demokratiya tarafdori boʻlgan tashkilot Vyetnam hukumatini Kambojada oʻz aʼzolaridan ikki nafarini — Avstraliya va Norvegiya fuqarolarini oʻgʻirlab, chegara orqali qaytarib olib ketishda aybladi.
Vyetnam rasmiylari Chan Xiyep va Nguyen Dik Txuanni hibsga olganliklarini maʼlum qilishdi, biroq bu juftlik mamlakatga soxta hujjatlar bilan kirib kelgani va terrorchilik faoliyatini amalga oshirishni rejalashtirganini daʼvo qilishdi.
Ularning aytishicha, erkaklar Vyetnam terrorchilik tashkiloti deb hisoblaydigan "Vyet Tan" tashkiloti aʼzosi ekanliklarini tan olishgan.
"Vyet Tan" hibsga olishlarni "Vyet Tan aʼzolari Kambojada oʻgʻirlab ketilgani va Vyetnamga majburan olib kelingani faktini yashirishga qaratilgan yaqqol uydirma" deb atadi.
Vyetnamda va xorijda aʼzolariga ega boʻlgan guruhning maʼlum qilishicha, ikki erkak Kambojaning janubiy chegarasidagi Kaox Andayet tumanida sayohat qilib yurgan vaqtida gʻoyib boʻlgan va 18 sentyabrdan beri ulardan hech qanday xabar boʻlmagan.
Channing rafiqasi Xloya Dang Avstraliya OAVlariga turmush oʻrtogʻi Kambojada demokratiya tarafdori boʻlgan faollar bilan uchrashayotgani va Vyetnamga borish niyati yoʻqligini aytgan.
Uning soʻzlariga koʻra, turmush oʻrtogʻi Avstraliyaga qaytish reysiga chiqish uchun Bangkokda u bilan uchrashishi kerak edi, ammo u yerga yetib kelmagan.
"U inson huquqlari sohasida ishlash xavfli ekanligini doim bilardi, lekin biz bunday boʻlishini hech qachon oʻylamagandik", dedi u ABC telekanaliga.
Dushanba kuni Vyetnam davlat OAVlarida eʼlon qilingan xabarda aytilishicha, Chan va Nguyen 18 sentyabr kuni Taynin provintsiyasidagi chegarada uchinchi bir erkak bilan birga qoʻlga olingan.
Uchovlon "'Vyet Tan' terrorchilik tashkiloti aʼzosi ekanliklarini [va] terrorchilik hamda qoʻporuvchilik harakatlarini amalga oshirish maqsadida Vyetnamga noqonuniy kirish uchun soxta hujjatlar olib yurganliklarini tan olishdi", deyiladi xabarda.
Dushanba kuni ularga terrorchilik tashkilotiga aʼzolik ayblovi qoʻyildi, tergovchilar esa "gumonlanuvchilarning jinoiy qilmishlariga aniqlik kiritish va ularga nisbatan qonun doirasida chora koʻrish" ustida ishlashda davom etmoqda, deyiladi unda.
"Davlatning xorijda shaxslarni oʻgʻirlashni tashkillashtirishi va ularni oʻz hududiga majburan olib kelishi transmilliy qatagʻonning jiddiy koʻrinishidir", dedi "Vyet Tan". "Bu Kamboja suverenitetini va xalqaro huquqning asosiy tamoyillarini buzadi."
"Vyet Tan" bayonotida rasmiylar Txay Kong Chiong Shon deb atagan uchinchi erkak haqida tilga olinmagan.
Avstraliya Bosh vaziri Entoni Albaniz Channing oilasiga konsullik yordami koʻrsatilayotganini aytdi.
"Avstraliya hukumati oʻz fuqarolari uchun shunday qiladi. Va biz oila bilan bevosita aloqada boʻlishni davom ettiramiz."
"Vyetnam rasmiylarining [ushbu] faollarni hibsga olganliklarini tasdiqlashi... Xanoy bugungi kunda Janubi-Sharqiy Osiyoda transmilliy qatagʻonning eng shafqatsiz va zararli ijrochisi ekanligini yana bir bor isbotlaydi", dedi Osiyo inson huquqlari va mehnat himoyachilari tashkiloti direktori Fil Robertson oʻz bayonotida.
"Bu galgi harakat qabul qilib boʻlmaydigan darajadagi vahshiylikdir."