Humo Air aviakompaniyasi davlatga qaytariladi va yana xususiylashtirishga qo‘yiladi
O‘zbekiston hukumati Humo Air`ning 100 foiz ulushini sotishni rejalashtirmoqda. Aviakompaniya 2022-yilda 2,4 mln dollarga xususiylashtirilgandi, biroq DABA Gazeta`ga investor bilan shartnoma bekor qilinganini ma’lum qildi. Yaqin kunlarda 100 foizlik ulush yana davlat nomiga qayta rasmiylashtirilishi kerak.
Humo Air aviakompaniyasi davlat tasarrufiga qaytarilib, yana xususiylashtirishga chiqariladi
O‘zbekistonda Humo Air aviakompaniyasidagi 100% davlat ulushini sotish ko‘zda tutilmoqda. Aviakompaniya prezidentning 28-avgustdagi farmoni bilan tasdiqlangan ommaviy savdolarga qo‘yiladigan davlat aktivlari ro‘yxatiga kiritildi.
E’tiborlisi, Humo Air 2022-yil oxirida ham xususiylashtirilgan edi. O‘shanda kompaniyaning 100% ulushini Shveysariyaning ValleyRoad Capital S.A. investitsiya kompaniyasi 27,2 milliard so‘mga ($2,4 mln) xarid qilgan. Keyinchalik aviakompaniya loukoster modeli asosida faoliyat boshlagan.
Yangi hujjatda qayd etilishicha, hozir Humo Air`ning 100% ulushi yana davlatga tegishli va ushbu to‘liq ulush 2026−2027-yillarda ommaviy savdolar orqali sotilishi kerak. Shu bilan birga, farmonda aviakompaniya qachon va qaysi asosda yana davlat mulkiga o‘tgani aniqlashtirilmagan.
Bundan tashqari, Korxonalar va tashkilotlarning yagona davlat registri (KTYADR)ning 8-sentabrdagi ochiq ma’lumotlari Humo Air`ning boshqa mulkchilik tuzilmasini ko‘rsatmoqda. Reyestrga ko‘ra, kompaniyaning 51% ulushi hanuz ValleyRoad Capital`ga, qolgan 49% ulushi esa Davlat aktivlarini boshqarish agentligiga (DABA) tegishli.
Davlat aktivlarini boshqarish agentligi Gazeta`ga investor bilan tuzilgan shartnoma bekor qilingani va Humo Air`ning 100% ulushi davlatga qaytarilayotganini ma’lum qildi.
Humo Air 2020-yil yanvarida davlatga tegishli “Maxsus aviatsiya ishlari aviakompaniyasi” negizida tashkil etilgan edi. Tashuvchiga Uzbekistan Airways`ga nisbatan arzonroq muqobil sifatida qisqa ichki reyslarni bajarish uchun 43 ta An-2 samolyoti berilgan.
2021-yil dekabrida aviakompaniya haftasiga ikki marta amalga oshiriladigan Farg‘ona — So‘x — Farg‘ona yo‘nalishi bo‘yicha parvozlarni yo‘lga qo‘ydi.
2022-yil oxirida Humo Air`dagi davlat ulushi Shveysariyaning ValleyRoad Capital S.A. kompaniyasiga sotildi. Investor bir qator majburiyatlarni zimmasiga olishga rozi bo‘ldi. Xususan, 2026-yilgacha investor 18 ta samolyot, jumladan, 2023-yilning ikkinchi choragi oxirigacha uchta samolyot xarid qilishi kerak edi.
Dastlab yangi egasi birinchi uchta samolyotni qabul qilib olib, 2023-yil iyun oyi oxirigacha muntazam loukost reyslarini boshlashi kutilgandi. Biroq samolyotlar kechikib yetib kelgani sababli yo‘lovchi tashish faqat dekabr oyida boshlandi.
Boshlang‘ich bosqichda Humo Air Toshkentdan Nukus, Samarqand, Urganch va Qarshi shaharlariga reyslarni amalga oshirishni boshladi. 2024-yil yanvarida yo‘nalishlar tarmog‘i kengayib, Samarqand va Urganch o‘rtasida, shuningdek, Toshkentdan Farg‘onaga ham parvozlar yo‘lga qo‘yildi.
O‘sha paytda aviakompaniya parki Bolgariyaning Fly2Sky kompaniyasidan lizingga olingan ikkita Airbus A320−200 samolyotidan iborat edi.
2024-yil fevral oxirida Humo Air xalqaro yo‘nalishlarni yo‘lga qo‘yishga tayyorgarlik ko‘rish va tizimni yangilash uchun 10-martdan boshlab barcha parvozlarni vaqtincha to‘xtatishini e’lon qildi.
Mart boshida aviakompaniya Fly2Sky bilan ikkala Airbus A320 samolyotini ham qaytarish bo‘yicha kelishuvga erishdi. Humo Air bu qarorni amaldagi lizing shartnomasi shartlari belgilangan biznes-reja asosida rivojlanishga imkon bermagani bilan izohladi.
Bir samolyot 2-martda lizing beruvchiga qaytarildi, ikkinchisi esa 10-martgacha reyslarni yakunlashi kerak edi. O‘shanda aviakompaniya yangi lizing beruvchidan havo kemalarini aprel oyidayoq qabul qilib olish va shundan so‘ng muntazam reyslarni qayta tiklashga umid qilayotganini bildirgandi.
Humo Air ichki yo‘nalishlarni saqlab qolgan holda, asosiy e’tiborni xalqaro tashuvlarga qaratishni rejalashtirgandi. Rejalashtirilgan xorijiy yo‘nalishlar orasida Olmaota, Istanbul va Dubay tilga olingan edi.
Bundan tashqari, tashuvchi yaqin kelajakda 1000 ta reys bajarish va 200 mingdan ortiq yo‘lovchi tashish niyatida ekanini bildirgan.
Endilikda, birinchi xususiylashtirishdan bir necha yil o‘tib, Humo Air yana aktivlarni sotish bo‘yicha davlat dasturiga kiritildi.