Hujumlar avj olgani sababli AQSh Davlat departamenti baʼzi xodimlariga Saudiya Arabistonini tark etishni buyurdi
AQSh mulozimlariga ogohlantirish aeroport va neft konlariga berilgan soʻnggi zarbalar oqibatida kamida uch kishi halok boʻlgan bir paytda yangradi.
AQSh Davlat departamenti hujumlar shiddatlashgani sababli ayrim xodimlariga Saudiya Arabistonini tark etishni aytdi
Yamanning Eron tomonidan qoʻllab-quvvatlanuvchi husiylari shu oy boshida Saudiya Arabistoni poytaxti Riyoddagi aeroportga ham zarba bergan edi
AQSh Davlat departamenti mamlakat boʻylab berilgan zarbalarda uch kishi halok boʻlganidan keyin, hujumlar shiddatlashgani sababli ayrim diplomatlar va ularning oilalariga Saudiya Arabistonini tark etishni buyurdi.
Saudiya rasmiylarining bildirishicha, neft koniga qilingan hujum urinishi paytida tutib qolingan dron parchalari ikki kishining yostigʻini quritgan, yana bir kishi esa Dammamdagi Qirol Fahd xalqaro aeroportiga berilgan zarbadan soʻng vafot etgan.
Yamanning Eron tomonidan qoʻllab-quvvatlanuvchi husiylari va Saudiya Arabistoni oʻrtasidagi nizo oʻtgan oy davomida avj oldi.
Saudiya zarbalariga javoban husiylar Saudiya Arabistonidagi aeroportlar, energetika obʼyektlari va harbiy bazalarga raketalar hamda dronlar otdi. Riyod xalqaro aeroportiga yaqinda qilingan hujum qirollikda oxirgi yillarda sodir boʻlgan eng koʻp odam yostigʻini quritgan hujum boʻldi.
«AQSh Davlat departamenti Saudiya Arabistonidagi favqulodda vaziyatlarga jalb qilinmagan AQSh hukumati xodimlari va ularning oila aʼzolari uchun mamlakatni tark etish haqida majburiy koʻrsatma chiqardi», — deydi Davlat departamenti matbuot kotibi oʻz bayonotida.
«Eron tomonidan qoʻllab-quvvatlanuvchi husiylar Saudiya Arabistoniga qarshi harbiy harakatlarni tobora oshirib bormoqda, jumladan, fuqarolik aeroportlari va boshqa muhim infratuzilmalarga qilingan hujumlar tinch aholi orasida talofatlarga va qatnoashda jiddiy uzilishlar keltirib chiqarmoqda», — deyiladi bayonotda.
Matbuot kotibi shuningdek, «harbiy harakatlar shiddat bilan avj olish potentsialiga ega» ekanidan ogohlantirdi.
Rasmiylarning aytishicha, Qirol Fahd xalqaro aeroportiga qilingan oxirgi hujumda sakkiz kishi tan jarohati olgan, jarohatlar «yengildan ogʻirgacha» boʻlgan.
Hujum tafsilotlari hozircha oshkor qilinmadi, ammo bu zarba husiylarning Saudiya Arabistoni aeroportlariga qilgan ketma-ket hujumlarining davomi boʻldi.
Energetika vazirligi shuningdek, Birlashgan Arab Emirliklari bilan chegara yaqinidagi Shayba neft konini nishonga olgan va ikki kishining jarohatlanishiga sabab boʻlgan dronni kim uchirganini aytgani yoʻq.
Yaman 2014 yilda husiylar hukumatni poytaxt Sanodan haydab chiqarganidan beri boshlangan fuqarolar urushidan vayron boʻlgan. 2015 yilda Saudiya boshchiligidagi harbiy koalitsiya hukumat boshqaruvini tiklashga uringanidan soʻng janglar yanada avj oldi.
Oxirgi toʻrt yil davomida norasmiy oʻt ochishni toʻxtatish tartibi amal qilib kelayotgan edi, ammo iyul oyida husiylar Saudiya Arabistoniga qarshi «dengiz embargosi» eʼlon qilib, Saudiya aeroportlari, neft obʼyektlari va Qizil dengizdagi tankerlarga raketa va dron hujumlarini boshlaganidan soʻng u barbod boʻldi.
Husiylar buni oʻz hududlarining Saudiya tomonidan qamal qilinishiga va Sano aeroportiga berilgan, ular qirollikni aybdor deb bilgan havo zarbasiga qasos deb atashdi.
Guruhning Yamanning janubi-gʻarbiy sohili boʻylab Bob al-Mandab boʻgʻizida joriy etgan «dengiz embargosi» jahonda neft narxining oshishiga yordam berdi, chunki AQSh va Isroilling Eron bilan urushi Koʻrfazdagi Hurmuz boʻgʻizini amalda yopib qoʻyganidan beri Saudiya Arabistoni neft eksporti uchun Qizil dengizga tayanib kelayotgan edi.