Hududlarda imtiyozli suyultirilgan gazni spekulyantlar orqali qayta sotish sxemalari fosh etildi

Hududlarda imtiyozli suyultirilgan gazni spekulyantlar orqali qayta sotish sxemalari aniqlandi

Davlat xavfsizlik xizmati, Ichki ishlar vazirligi, Bosh prokuratura, Favqulodda vaziyatlar vazirligi va «Oʻzenergoinspektsiya» xodimlari butun respublika boʻylab aholi uchun moʻljallangan suyultirilgan gaz ballonlarining noqonuniy aylanmasiga chek qoʻyishga qaratilgan reydlar oʻtkazdi.

Joriy yilning 19-21 oktyabr kunlari oʻtkazilgan tekshiruvlar davomida 120 dan ortiq huquqbuzarlik aniqlandi, shundan 39 ta holatda gaz taʼminoti tashkilotlari xodimlarining bevosita aloqadorligi aniqlandi. Ashyoviy dalil sifatida noqonuniy aylanmadan 3 mingdan ortiq gaz balloni va 13 636 kilogramm suyultirilgan gaz olindi.

Jumladan, Jizzax viloyatida 9 ta holatda kelgusida qayta sotish maqsadida 239 ta gaz balloni noqonuniy saqlanayotgani aniqlandi, jumladan, Zomin tumani gaz taʼminoti boʻlimining sobiq yuqori lavozimli xodimi qarindoshining xonadonida 152 ta ballonni yashirincha saqlab kelgan.

Sirdaryo viloyatida Xavos tumani gaz taʼminoti boʻlimi mansabdor shaxsining xonadonida hujjatsiz 30 ta ballon aniqlandi, Navoiy viloyatida Xatirchi tumangaz haydovchisidan 26 ta ballon olindi, Fargʻona viloyatida esa Qoʻshtepa tumangaz muhandisi va slesari aholi uchun moʻljallangan 8 ta gaz ballonini noqonuniy sotish uchun oʻz xonadonlarida saqlab kelishgan.

Samarqand viloyatida oʻtkazilgan tezkor tadbir davomida Urgut tumani gaz toʻldirish shoxobchasi qorovuli toʻldirilgan 3 ta ballonni 2,5 million soʻmga sotishga uringan vaqtida ushlandi.

Pastdargʻom tumanida yashovchi, 1972 yilda tugʻilgan fuqaroning xonadoni koʻzdan kechirilganda, tezkor xodimlar toʻldirilgan 22 ta ballonni aniqladilar. Erkak ularni tumangaz haydovchisidan 70 ming soʻmdan sotib olib, fuqarolarga 100 ming soʻmdan qayta sotib kelgan.

Surxondaryo viloyatida 65 ta ballonning noqonuniy saqlanishi hujjatlashtirildi, xususan, Bandixon tumanida yashovchi 39 yoshli fuqaro yuqori narxda qayta sotish uchun tumangaz haydovchisidan 32 ta ballonni 70 ming soʻmdan xarid qilgan.

Ana shunday holatlar Qoraqalpogʻiston, Xorazm, Namangan va boshqa viloyatlarda ham aniqlandi, fuqarolarga esa bu kabi huquqbuzarliklar haqida DXXning 1520 qisqa raqamli koll-markaziga xabar berish imkoniyati eslatib oʻtildi.