«Hozirgi vaqtda bizda dunyodagi eng yaxshi jamoa bor». Oʻzbekiston shaxmatchilari Olimpiadadagi gʻalabadan keyin nimalar deyishdi

«Hozirgi vaqtda bizda dunyodagi eng yaxshi jamoa bor». Oʻzbekiston shaxmatchilari Olimpiadadagi gʻalabadan keyin nimalar deyishdi

Oʻzbekiston terma jamoasi sardori Rustam Qosimjonov jamoaning Samarqanddagi Butunjahon shaxmat olimpiadasidagi triumfidan soʻng, muvaffaqiyatning asosiy omillaridan biri mamlakatda shaxmatga koʻrsatilayotgan qoʻllab-quvvatlash, shuningdek, jamoa ichidagi muhit va turnirning barcha detallari sinchiklab ishlab chiqilgani boʻlganini soʻzlab berdi.

Ikkinchi olimpiya oltinini qoʻlga kiritgandan keyingi matbuot anjumanida Javohir Sindarov Oʻzbekiston sharafini himoya qilishdan faxrlanishini maʼlum qildi, Nodirbek Abdusattorov terma jamoani «hozirgi vaqtda dunyodagi eng yaxshi jamoa» deb atadi, Muhiddin Madaminov esa sheriklarining qoʻllab-quvvatlashi unga oʻzining ilk Olimpiadasidagi hayajonni yengishga qanday yordam berganini gapirib berdi.

Rustam Qosimjonovga berilgan birinchi savol terma jamoaning «siri» haqida boʻldi, u buni avvalroq faqat Olimpiadadagi gʻalabadan keyin oshkor qilishga vaʼda bergan edi.

«Oʻylaymanki, bizda sirlar koʻp. Bittagina sir yoʻq. Eng muhimi — mamlakatimizda shaxmatga qanchalik katta eʼtibor qaratilayotganidir. Buni oʻzingiz ham koʻrib turibsiz, bu alohida bir narsa», — dedi u.

Sardorning soʻzlariga koʻra, tayyorgarlik jarayonida jamoaga mashgʻulotlar oʻtkazish va musobaqalarda ishtirok etish uchun barcha imkoniyatlar yaratib berilgan.

«Bu, ehtimol, bizning boshqa mamlakatlardan eng katta farqimizdir. Bu mamlakatda hokimiyatning eng yuqori boʻgʻinlaridan, shaxsan Prezidentdan, Bosh vazirdan olayotgan eʼtiborimiz — misli koʻrilmagan. Dunyoda bunday mamlakat boshqa yoʻqligiga ishonchim komil», — deya taʼkidladi Qosimjonov.

Ikkinchi ustunlik sifatida u jamoa tarkibini tilga oldi.

«Qarshingizda nafaqat ushbu mamlakatning eng yaxshi shaxmatchilari, balki ular dunyoning ham eng yaxshi shaxmatchilaridandir. Va biz jamoa sifatida ajoyib ishlaymiz. Bizda juda nodir narsa bor — jamoa oʻyinchilari bir-birlarini chindan ham yaxshi koʻrishadi. Bunday holat har bir terma jamoada ham boʻlavermaydi. Biz birgamiz, biz doʻstmiz va bu yordam beradi».

Qosimjonov tayyorgarlik tashkilotchilari mutlaqo barcha detallarni hisobga olishga harakat qilishganini taʼkidladi.

«Biz qoʻlimizdan kelgan barcha ishni qildik. Hech narsani tasodifga tashlab qoʻymadik. Mutlaqo hamma narsaga: ovqatlanish, mehmonxona, soniyachilar (sekundantlar), murabbiylarga eʼtibor qaratdik. Bu turnir qanchalik muhimligini hisobga olib, har bir mayda-chuydagacha oʻylab chiqdik».

U oʻz uyidagi Olimpiadani «hayotda bir marta beriladigan imkoniyat» deb atadi.

«Hech narsani tasodifga tashlab qoʻyib boʻlmasdi. Bizning sirimiz ham shunda: biz hamma narsa haqida oʻylaymiz va hamma narsani qilamiz. Qolaversa, bizda dunyodagi eng yaxshi jamoa bor. Bu ham yordam beradi», — deya qoʻshimcha qildi sardor.

Muhiddin Madaminov hozirgi terma jamoaning 2022 yilgi gʻolib Olimpiadada ishtirok etmagan yagona oʻyinchisi edi. Samarqandda u ilk bor Olimpiadada oʻynadi va yakuniy turda Ukraina bilan uchrashuvda jamoaga hal qiluvchi ochkoni keltirdi.

«Men ushbu jamoaning bir qismi boʻlganimdan juda xursandman. Bizda juda kuchli, elita oʻyinchilar bor. Nodirbek [Abdusattorov] va Javohir [Sindarov] — juda kuchli shaxmatchilar», — dedi Madaminov.

U turnir davomida Qosimjonovdan qanday soʻzlarni eshitganini soʻzlab berdi. «Turnir davomida sardor menga: „Xavotir olma va qoʻrqma, chunki sening jamoangda Nodirbek va Javohir bor. Shuning uchun shunchaki shaxmat oʻyna“, dedi. Bu soʻzlar va bunday qoʻllab-quvvatlash bizga chindan ham yordam beradi».

Madaminov oʻzining ilk Olimpiadasida aynan oʻz uyida gʻolib chiqqanidan alohida mamnunligini tan oldi.

«Bugun juda aql bovar qilmas va juda asabiy oʻyin boʻldi. Gʻalaba qozonganimdan va ushbu jamoaning kuchli oʻyinchilaridan biri boʻla olganimdan juda xursandman».

Javohir Sindarovdan (uning chiqishlari va tayyorgarligini Oʻzbekiston Milliy banki qoʻllab-quvvatlaydi) soʻnggi yillarda Oʻzbekiston nima uchun bir yoʻla bir nechta jahon darajasidagi shaxmatchilarni tarbiyalab chiqargani haqida soʻrashdi.

Uning soʻzlariga koʻra, 2022 yilgi Olimpiadadagi gʻalabadan keyin mamlakatda shaxmatga boʻlgan munosabat sezilarli darajada oʻzgardi. «U juda katta sport turiga aylandi va hukumatimiz, Prezidentimiz shaxmatni juda yaxshi qoʻllab-quvvatlamoqda», — dedi Sindarov.

U kuchli avlodning paydo boʻlishini, eng avvalo, oʻyinchilar uchun yaratilgan sharoitlar bilan bogʻladi.

«Qachonki sizda Oʻzbekistondagidek qoʻllab-quvvatlash boʻlsa, oʻylaymanki, istalgan boshqa mamlakatda ham koʻplab Nodirbeklarni, men kabi koʻplab oʻyinchilarni koʻrgan boʻlardingiz. Ehtimol, eng asosiysi shu — davlat bizni chindan ham juda yaxshi qoʻllab-quvvatlamoqda».

Sindarov muxlislarni ham alohida taʼkidlab oʻtdi. «Siz bu barcha muxlislarni koʻrib turibsiz — ular bizni har kuni qoʻllab-quvvatlashmoqda. Bu mamlakatimizda odamlar shaxmatni chindan ham qanchalik yaxshi koʻrishini koʻrsatadi. Men oʻzbek ekanligimdan va ushbu mamlakat sharafini himoya qilayotganimdan chindan ham faxrlanaman».

U ushbu oltin oxirgisi boʻlib qolmasligiga umid bildirdi.

«Umid qilamanki, keyingi yillarda biz yana bitta emas, koʻplab Olimpiadalarda gʻolib chiqamiz. Bu turnirda biz chindan ham juda yuqori darajani koʻrsatdik. Hamma yaxshi oʻynadi, shuning uchun bu natijadan xursandman».

Kelgusi maqsadlar haqidagi savolga Sindarov jahon chempioni boʻlish istagi borligini maʼlum qildi.

«Albatta, biz ham jamoaviy, ham yakka tartibda koʻp narsaga erishdik, deb ayta olaman. Soʻnggi yillarda koʻplab turnirlarda gʻolib chiqyapmiz. Albatta, yangi maqsad — jahon toji», — deya bayonot berdi u.

Sindarovning soʻzlariga koʻra, u jamoadoshlarini jahon reytingida yanada yuqoriroq pogʻonalarda koʻrishni istaydi.

«Oʻylaymanki, barchamiz Nodirbek [Yoqubboyev], Muhiddin [Madaminov], Shamsiddin [Vohidov] imkon qadar tezroq 2700 darajasiga, Nodirbek esa 2750 darajasiga chiqishini, barchamiz dunyoning top-15−20 taligida boʻlishimizni va keyingi yillarda Olimpiadalarda Oʻzbekiston nufuzini yuksaltirishda davom etishni hamda mamlakatimiz uchun bor kuchimizni berishni xohlaymiz».

Nodirbek Abdusattorovdan u ham terma jamoa yetakchisi boʻlgan 2022 yilgi Olimpiadadan buyon uning masʼuliyati qanday oʻzgargani haqida soʻrashdi.

«Mening masʼuliyatim faqat bir narsada — jamoani boshlab borish, oʻz taxtamda oʻynash va boshqa yigitlarni ruhlantirishdan iborat edi», — deb javob berdi u.

Abdusattorov sheriklarining darajasini yuqori baholadi. «Bizning ajoyib jamoamiz bor. Oʻylaymanki, hozir bizda dunyodagi eng yaxshi jamoa bor deb ishonch bilan ayta olaman. Oʻylaymanki, hatto mensiz ham jamoa yaxshi ishtirok etgan boʻlardi, lekin men uni boshlab borishdan va uning bir qismi boʻlishdan behad baxtiyorman va faxrlanaman», — dedi u.

Uning soʻzlariga koʻra, hozirgi tarkibdagi istalgan oʻyinchi jahon oʻnligiga koʻtarilishga qodir.

«Mening masʼuliyatim umuman oʻzgargani yoʻq. Men har bir partiyada bor kuchimni berishga harakat qildim. Yaxshi oʻynaganimdan va ushbu turnirda birorta ham partiyada yutqazmaganimdan xursandman. Yigitlar bilan birgalikda allaqachon erishgan barcha narsalarimiz uchun behad minnatdorman. Oʻylaymanki, oldinda hali juda koʻplab gʻalabalar bor», — deya qoʻshimcha qildi Abdusattorov.

Nodirbek Yoqubboyevdan 2022 va 2026 yillardagi Olimpiadalardagi gʻalabalar oʻrtasidagi farq haqida soʻrashdi.

«2022 yilda biz favorit hisoblanmasdik. Biz turnirning kutilmagan sovgʻasi boʻldik va kutilmaganda unda gʻolib chiqdik. Bu safar esa biz allaqachon asosiy favoritlardan biri sifatida keldik», — deb javob berdi u.

Uning soʻzlariga koʻra, eng avvalo, raqiblarning Oʻzbekiston bilan oʻyinlarga tayyorgarligi oʻzgargan.

«Oʻtgan safar, ehtimol, raqiblar bizni mensishmagan, baribir yutamiz deb oʻylashgan boʻlishi mumkin. Ammo bu safar har bir jamoa bizga qarshi eng kuchli oʻyinchilarini tushirdi va oʻzlarining eng kuchli qurollarini ishga soldi», — dedi grossmeyster.

Shu bilan birga, avvalgi ikki Olimpiada tajribasi jamoaga yangi maqom bilan kurashishda yordam berdi.

«Biz 2022 yilda, keyin 2024 yilda tajriba orttirdik va oʻylaymanki, ushbu Olimpiadaga maksimal darajada yaxshi sport formasida yetib keldik. Germaniya bilan oʻyinni hisobga olmaganda, barcha uchrashuvlarimiz biz xohlagandek va kutgandek oʻtdi», — dedi Yoqubboyev.

«Men ushbu jamoaning bir qismi boʻlganimdan juda xursandman. Oʻylaymanki, terma jamoamiz hali koʻp yillar davomida oʻz darajasini isbotlaydi va umid qilamanki, jahon shaxmatining asoslaridan biriga aylana oladi», — deya qoʻshimcha qildi shaxmatchi.

Jurnalistning chempion jamoaning «qahramoni» kim degan savoliga Yoqubboyev sardorni koʻrsatdi.

«Bizning qahramonimiz — sardorimiz Rustam aka Qosimjonov», — dedi u, shundan soʻng muxlislar Qosimjonovning ismini hayqirib ayta boshlashdi.

Soʻngra shaxmatchi qoʻshimcha qildi: «Oʻylaymanki, barcha oʻyinchilar juda yaxshi ishtirok etishdi. Koʻpchiligimiz oʻz taxtalarimizda medallar oldik. Shuning uchun, oʻylaymanki, barchamiz qahramonlarmiz», — deya bayonot berdi u.

Shamsiddin Vohidov matbuot anjumani yakunida ikkinchi olimpiya oltini mamlakat uchun katta yutuq ekanini aytdi.

«Bu gʻalaba biz uchun — juda katta yutuq. Ikkinchi marta olimpiya chempionlari boʻlish — bu juda jiddiy natija. Barcha yigitlar juda yaxshi oʻynashdi, biz koʻplab muhim uchrashuvlarda gʻalaba qozondik», — dedi u.

U qoʻllab-quvvatlaganlari uchun muxlislarga va mamlakat aholisiga alohida minnatdorchilik bildirdi.

Matbuot anjumani «Oʻzbekiston! Oʻzbekiston!» hayqiriqlari va chempionlar sharafiga qarsaklar bilan yakunlandi.

Olimpiadaning yakuniy, 11-turida Oʻzbekiston Ukrainani 2,5:1,5 hisobida magʻlub etdi va turnirni birinchi oʻrinda yakunladi. Hindistonning Vengriya bilan 2:2 hisobidagi durangidan soʻng, jamoa uchrashuv tugashidan oldinroq chempionlikni kafolatlagan edi. Oʻzbekiston uchun bu ikkinchi olimpiya oltinidir: terma jamoa ilk bor 2022 yilda Chennayda turnir gʻolibi boʻlgan, 2024 yilda esa Budapeshtda bronza medalini qoʻlga kiritgan edi.