Homiladorlik va kasallik nafaqalari “Baraka” kartasiga o‘tkaziladi
Homiladorlik va kasallik nafaqalari endi "Baraka" kartasiga o'tkaziladi
O'zbekistonda joriy qilingan yangi tartibga ko'ra, homiladorlik va tug'ish, shuningdek, vaqtincha mehnatga layoqatsizlik nafaqalari "Baraka" ijtimoiy kartasiga o'tkaziladi. Bu haqda Iqtisodiyot va moliya vazirligi ma'lum qildi.
Qayd etilishicha, bu tartib fuqarolarga ijtimoiy sug'urta bo'yicha to'lovlarni yanada qulay, tezkor va ortiqcha ovoragarchiliklarsiz olish imkonini beradi. Agar fuqaroda "Baraka" ijtimoiy kartasi mavjud bo'lsa, tayinlangan nafaqa mablag'lari hech qanday qo'shimcha ariza yoki murojaat talab qilinmagan holda avtomatik ravishda ushbu kartaga o'tkaziladi. Bunda fuqaroning bankka borishi, alohida hisob raqami ochishi yoki nafaqa mablag'larini olish uchun qo'shimcha hujjatlar taqdim etishi shart emas.
**"Baraka" kartasi bo'lmasa-chi?**
Agar fuqaroda "Baraka" ijtimoiy kartasi mavjud bo'lmasa, nafaqa tayinlangach, "Baraka" mobil ilovasi orqali fuqaro uchun virtual ijtimoiy karta avtomatik tarzda ochiladi. Tayinlangan nafaqa mablag'lari ushbu virtual kartaga o'tkazib beriladi. Virtual ijtimoiy kartaga ega bo'lish uchun bankka borish yoki alohida murojaat qilish shart emas. Fuqaro barcha zarur ma'lumotlarni "Baraka" mobil ilovasi orqali ko'rishi mumkin.
**Nafaqa mablag'larini qanday tekshirish mumkin?**
Nafaqa tayinlangach, fuqaro "Baraka" mobil ilovasiga kirib, o'zining virtual ijtimoiy kartasi hamda unga kelib tushgan mablag'lar haqidagi ma'lumotlarni ko'rishi mumkin. Shuningdek, ilova orqali karta va to'lovlar bilan bog'liq zarur ma'lumotlarni kuzatib borish imkoniyati mavjud. Shu sababli homiladorlik va tug'ish yoki vaqtincha mehnatga layoqatsizlik nafaqasi tayinlangan fuqarolarga "Baraka" mobil ilovasini yuklab olish va undagi ma'lumotlarni muntazam tekshirib borish tavsiya etiladi.
**Yangi tartibning afzalliklari**
Mazkur tizim, avvalo, nafaqa olish jarayonini soddalashtirishga qaratilgan. Fuqaroning nafaqa olish uchun qo'shimcha murojaat qilishi, bankka borishi yoki alohida karta ochish bilan bog'liq ortiqcha jarayonlardan o'tishi talab etilmaydi. To'lovlarning elektron shaklda amalga oshirilishi nafaqa mablag'larini fuqarolarga qulay va shaffof tarzda yetkazib berish imkonini yaratadi.
Shuningdek, "Baraka" ijtimoiy kartasi orqali nafaqa mablag'larini olish fuqarolarning to'lovlar haqidagi ma'lumotlardan tezkor foydalanishini ta'minlaydi.
Mazkur tartib davlat ijtimoiy sug'urtasi tizimini raqamlashtirish, xizmat ko'rsatish jarayonlarini soddalashtirish va fuqarolarga ko'rsatilayotgan ijtimoiy xizmatlar sifatini oshirishga xizmat qiladi.
Vazirlikning bildirishicha, jismoniy plastik karta kerak bo'lsa, "Baraka" mobil ilovasi orqali buyurtma berish mumkin. Kasallik nafaqasi tayinlangan fuqarolarga "Baraka" ijtimoiy kartasi bepul rasmiylashtirib beriladi.
Ijtimoiy himoya milliy agentligi nafaqa tayinlanganini aniqlash, qachon to'lanishi yoki kasallik nafaqalari miqdori bilan qiziqqan fuqarolar 1070 ishonch raqamiga qo'ng'iroq qilib, yoki mahallaga biriktirilgan "Inson" ijtimoiy xizmatlar markazining To'lovlar sho'basiga murojaat qilish mumkinligini bildirdi.