Hindistonda toʻsiq bilan yopilgan norozilik maydoniga kirgan «suvaraklar» etakchilari hibsga olindi
Deli markazida namoyishchilar saylov komissiyasi rahbarining saylovchilarning yangilangan roʻyxatlari sababli isteʼfoga chiqishini talab qilib, tosiqlardan oshib oʻtishdi.
Hindistonda «Suvaraklar» partiyasi yetakchilari toʻsib qoʻyilgan norozilik maydoniga kirganidan keyin hibsga olindi
Hindistonning «Cockroach Janta Party» (CJP — «Suvaraklar xalq partiyasi») yetakchilari seshanba kuni ertalab qattiq qoʻriqlanadigan norozilik maydoniga kirib, saylovchilar roʻyxatining bahsli qayta koʻrib chiqilishi ortidan mamlakat saylov komissiyasi rahbarining isteʼfosini talab qilib hayqirganidan soʻng hibsga olindi.
Partiya asoschisi Abxijit Dipke politsiya tomonidan Delidagi mashhur norozilik oʻtkazish joyi boʻlgan tarixiy observatoriya — Jantar Mantardan Ashutosh Ranka va Saurav Das olib ketilayotgani aks etgan videoni joylashtirdi.
Kadrlarda bu ikki erkak boshqalar bilan birgalikda politsiya toʻsiqlaridan oshib oʻtgani, soʻngra Hindiston bayrogʻini tutgan holda shiorlar aytgani koʻrinadi.
Bosh vazir Narendra Modining raqiblari saylovchilar roʻyxatining qayta koʻrib chiqilishi uning partiyasiga yordam beradi, deb taʼkidlamoqda, bu daʼvo ham partiya, ham Saylov komissiyasi tomonidan rad etilgan.
Norozilik namoyishlari bir necha kundan beri davom etmoqda, namoyishchilar Bosh saylov komissari Gyanesh Kumarning isteʼfosini talab qilmoqda.
Namoyishchilar aktsiyalar oʻtkazilishi mumkin boʻlgan joylarga qoʻyilgan cheklovlarga qarshi chiqayotgani sababli politsiya tseshanba kuni butun Deli boʻylab xavfsizlik choralarini kuchaytirdi.
Seshanba kuni ertalab Dipke, Das va Rankalarning barchasi Das va Rankaning Jantar Mantarga kirayotgani aks etgan videolarni ulashdi.
«Siz qarshilikni bekor qila olmaysiz», deb yozdi Dipke X platformasida.
Das ham bu joy «qaytarib olingani» va ular hibsga olinayotgani haqida xabar joylashtirdi.
Politsiya yetakchilarni qayerga olib ketgani darhol aniq boʻlmadi.
Keyinroq Ranka boshqa hibsga olinganlar bilan birga politsiya avtobusidan Instagram'da toʻgʻridan-toʻgʻri efirga chiqdi, u yerda ular xushnud koʻrindi va chekinmasliklarini aytishdi.
Hibsga olishlar Federal Ichki ishlar vazirligi Delida uzoq vaqtdan beri ommaviy noroziliklar bilan bogʻlab kelingan Jantar Mantar endi norozilik bildirish uchun belgilangan joy boʻlmasligini eʼlon qilganidan bir kun oʻtib yuz berdi. Buning oʻrniga rasmiylar ruxsatnoma bilan namoyishlar oʻtkazish mumkin boʻlgan uchta muqobil joyni aytib oʻtdi.
Bu qarordan oldin CJP Jantar Mantarda tinch norozilik namoyishi oʻtkazishga ruxsat soʻrab Deli politsiyasi mutasaddilari bilan uchrashgan va agar javob olmasa, keyingi namoyishlarni eʼlon qilishi haqida ogohlantirgan edi.
«Deli politsiyasiga Jantar Mantarga qachon borishimiz mumkinligi haqida sana soʻrab murojaat qilganimizdan 30 daqiqa oʻtgach, Jantar Mantar norozilik maydoni maqomidan mahrum qilindi», deb yozgan edi avvalroq Ranka X’da.
Partiya rahbariyatining aksariyat qismi oxirgi kunlarda Delida boʻlib turgan edi. Biroq, Dipke buvisining vafotidan soʻng Maxarashtradagi ona shahriga joʻnab ketgan edi. U shanba kuniga rejalashtirilgan namoyish oldidan hibsga olingan va ertasi kuni qoʻyib yuborilgan bir necha CJP yetakchilari orasida edi.
CJP shanba kuni Jantar Mantarda norozilik namoyishi oʻtkazishga chaqirgan edi, ammo rasmiylar namoyishchilarning ushbu joyga yetib borishiga yoʻl qoʻymaslik uchun poytaxt boʻylab keng koʻlamli xavfsizlik cheklovlarini joriy etdi.
Bir nechta metro bekatlari yopildi, poyezdlar qatnovi izdan chiqdi hamda minglab politsiya va harbiylashtirilgan kuchlar xodimlari safarbar qilindi.
Dam olish kunlarida politsiya minglab odamlarni, jumladan bir qancha jurnalistlarni hibsga oldi va keyinchalik qoʻyib yubordi. Norozilik aktsiyasidan olingan baʼzi video va fotosuratlarda politsiya odamlarni, jumladan ayollarni kuch bilan sudrab, avtobuslarga bilan itarib yuborayotgani koʻrinadi.
Alohida ravishda, muxolifat partiyalari dushanba kuni Delida poytaxt markazidagi yirik xarid qilish hududi boʻlgan Konnot Pleysdan Oliy sudgacha yurish oʻtkazdilar.
Hindistonning asosiy muxolifat partiyasi boʻlgan Kongress ham dushanba kuni Oliy sudga murojaat qilib, Saylov komissiyasining saylovchilar roʻyxatini qayta koʻrib chiqish tadbiriga eʼtiroz bildirdi, buning oqibatida oʻn millionlab ism-shariflar saylovchilar roʻyxatidan chiqarib tashlangan.
Manqidchilarning taʼkidlashicha, bu tadbir ovoz berish huquqiga ega boʻlgan saylovchilarni chetlashtirishi va ularning oʻz huquqlarini isbotlashlarini qiyinlashtirishi mumkin.
«The Indian Express» nashri Kumar saylovchilarni roʻyxatga olishdagi oʻzgarishlar boʻyicha boshqa ikki saylov komissari tomonidan bildirilgan xavotirlarni eʼtiborsiz qoldirgani haqida xabar berganidan keyin qayta koʻrib chiqish tadbiriga nisbatan gʻazab yanada ortdi. Saylov komissiyasi esa oʻz qarorlari bir ovozdan qabul qilinganini maʼlum qildi.
Hozirgi namoyishlar toʻlqini shu yil boshida imtihonlardagi qonunbuzarliklar boʻyicha talabalar boshchiligida oʻtkazilgan norozilik namoyishlarining davomidir. CJP iyul oyida federal taʼlim vaziri Dxarmendra Pradxanning isteʼfosi bilan yakunlangan oʻsha namoyishlarda muhim rol oʻynagan edi.