Hindiston oʻrmonidan topilgan orangutan bolalari kontrabanda boʻyicha tergovga sabab boʻldi
Kritik xavf ostida boʻlgan maymunlar oʻzlarining tabiiy yashash joylaridan ancha uzoqda, Hindiston sharqidagi Odisha shtatida topildi.
Hindiston oʻrmonida topilgan orangutan bolalari kontrabanda boʻyicha tergovga sabab boʻldi
Hindiston sharqidagi Odisha shtati oʻrmonida, oʻzlarining tabiiy yashash joylaridan juda uzoqda beshta orangutan bolasi topildi, bu esa ularning u yerga qanday kelib qolgani boʻyicha tergov boshlanishiga olib keldi.
Internetda keng tarqalgan fotosuratlar va videolarda yosh maymunlarning oʻz vatani boʻlgan tropik oʻrmonlardan minglab kilometr uzoqlikda, oʻrmon tuprogʻida bir-biriga yopishib oʻtirgani va banan yeyayotgani tasvirlangan.
Odisha oʻrmon xoʻjaligi vazirining aytishicha, tergovchilar hayvonlar mamlakatga xalqaro kontrabanda guruhi tomonidan olib kirilib, avtomagistral yaqinida qoldirib ketilgan-ketilmaganini oʻrganmoqda.
Orangutanlar seshanba kuni ertalab Balasor tumanida mahalliy aholi ularni koʻrib qolib, oʻrmon xoʻjaligi xodimlariga xabar berganidan keyin qutqarilgan.
Ularga birinchi tibbiy yordam koʻrsatilib, shtat poytaxti Bxubaneshvardagi Nandankanan hayvonot bogʻiga koʻchirildi va hozirda u yerda karantinda va kuzatuv ostida saqlanmoqda.
Balasor tumani oʻrmon xoʻjaligi xodimi Pratik Prakash Indalkar BBC’ga bergan intervyusida hayvonlar Odishaga oʻzlari yetib kela olmasligini va avtomobil yoʻli orqali olib kelingan boʻlishi mumkinligini aytdi.
«Beshta hayvon Gʻarbiy Bengaliya chegarasi yaqinidagi Bxogarai blokida joylashgan, qoʻriqxona qilinishi rejalashtirilgan Ranakata oʻrmonidan topildi», dedi u.
«Bu hudud asosan kazuarina daraxtlari bilan qoplangan va qalin oʻrmon emas. Shuningdek, u davlat ahamiyatidagi avtomagistralga yaqin joylashgan».
Xabar qilinishicha, Odisha hukumati Hindistonning Yovvoyi tabiatga qarshi jinoyatlarni nazorat qilish byurosidan ham tergov oʻtkazishni soʻragan. Tergovda politsiya, oʻrmon xoʻjaligi xodimlari va maxsus tezkor guruh ishtirok etmoqda.
Oʻrmon xoʻjaligi xodimlarining fikricha, orangutanlar bu hududda atigi ikki yoki uch kun boʻlgan.
Oʻrmonni tintuv qilish natijasida boshqa orangutanlar yoki hayvonlarning u yerga qanday kelib qolgani haqida hech qanday dalil topilmadi, dedi Indalkar.
Mutasaddilar BBC’ga ularni juda kichik chaqaloqlar deb taʼriflashdi, garchi baʼzi mahalliy xabarlarda ularning yoshi bir va ikki yosh oraligʻida ekani aytilgan boʻlsa-da.
Ularning juda yosh ekani bu topilmadan ayniqsa xavotirlanishga sabab boʻlmoqda, deydi yovvoyi tabiat boʻyicha ekspert Bisvajit Moxanti.
Yosh orangutanlar odatda bir necha yil davomida onalari bilan birga yashaydi va mustaqil yashab qolish uchun zarur boʻlgan koʻnikmalarni oʻrganadi. Urgʻochilari ham sekin koʻpayadi, odatda har sakkiz yilda bir marta tugʻadi.
Shu sababli, tabiiy yashash joylaridan minglab kilometr uzoqlikda va yaqin atrofda katta hayvonlar boʻlmagan holda beshta yosh orangutanning birgalikda topilishi ularning Odishaga qanday kelib qolgani haqida savollar tugʻdirdi.
Orangutanlarning uchta maʼlum yashovchi turi mavjud — Borneo, Sumatra va Tapanuli — va ularning barchasi Tabiatni muhofaza qilish xalqaro ittifoqi (IUCN) tomonidan butunlay yoʻq boʻlib ketish arafasidagi turlar roʻyxatiga kiritilgan.
Oʻrmonlarning kesilishi, yashash muhitining yoʻqolishi va ov qilish tufayli yillar davomida ularning soni keskin kamayib ketdi.
Orangutanlar bilan xalqaro tijorat savdosi Cites — yoʻq boʻlib ketish xavfi ostida turgan yovvoyi hayvonlar savdosini tartibga soluvchi global kelishuvga binoan taqiqlangan. Ular Hindistonning yovvoyi tabiatni muhofaza qilish qonunlari bilan ham himoyalangan.
Shunday boʻlsa-da, orangutanlar hanuzgacha ekzotik uy hayvonlari sifatida sotish va xususiy kollektsionerlar uchun kontrabanda qilinmoqda.
Bu Hindistonda yosh orangutanlarning topilishi bilan bogʻliq birinchi holat emas.
2022 yilda Assam va Mizoram chegarasi yaqinidagi nazorat-oʻtkazish punktida tashlab ketilgan ikkita orangutan bolasi topilgan edi. Rasmiylar ular Hindistonga qoʻshni Myanma orqali olib kirilgan deb gumon qilishgan.