Hind xonandasi Anuv Jain Bollivud koʻmagisiz muvaffaqiyatga erishgani haqida
Yulduz nima uchun musiqa chiqarishda «juda injiq» ekanini ochiqladi va kelajakdagi hamkorlik umidlari bilan oʻrtoqlashdi.
Hind xonandasi Anuv Jain Bollivud koʻmagisiz muvaffaqiyatga erishgani haqida
Qoʻshiqchi va muallif Hindiston musiqa olamida akustik indi-pop ijrochisi sifatida qanday qilib karyera qurgani haqida gapirib berdi.
Hind sanʼatkori Bollivud mashinasidan tashqarida, chindan ham shaxsiy tuyuladigan musiqa yaratib, muvaffaqiyatga erisha oladimi? Anuv Jainning fikricha, ha — va bu hatto «goʻzal» bir narsaga aylanishi mumkin.
Qoʻshiqchi va muallifning mayin ovozi YouTube'da yuz millionlab koʻrishlar sonini toʻpladi, bu Hindiston musiqa industriyasidagi mustaqil ijrochi uchun kichik yutuq emas.
BBC Newsbeat Jain bilan uning ilk jahon turnesi doirasidagi Yevropa boʻylab soʻnggi kontsertlariga tayyorgarlik koʻrayotgan paytda uchrashib, nima uchun u shoshilmasdan harakat qilayotgani va «yaxshilikdan umid qilayotgani» sabablarini bilib oldi.
«Gap raqamlarda emas», — deydi Jain Londondagi Roundhouse zalida chiptalari toʻliq sotilgan kontserti oldidan sahna ortida biz bilan suhbatda.
Biroq raqamlar ham koʻp narsadan darak beradi.
Hindistonning Panjob mintaqasidagi Ludxiana shahridan boʻlgan Jain oʻsmirlik chogʻidan qoʻshiq kuylashni boshlagan.
Oʻshandan beri uning munosabatlar va ayriliq haqidagi taʼsirli hikoyalarga boy qoʻshiqlari YouTube'da yuz millionlab marta koʻrildi.
Jain asosan hind tilida kuylaydi va uning qoʻshiqlari koʻpincha sevgi va sogʻinch kabi chuqur tuygʻularni ifodalaydi.
Muxlislarining aytishicha, uning musiqasi xuddi ularning hayotiga soundtrekdek va ular uchun juda qadrli tuyuladi.
Odamlar qalbiga oson yoʻl topa oladigan uslubi unga Instagram'da 3,9 million kuzatuvchi va Spotify'da oyiga 20 milliondan ortiq tinglovchi keltirdi.
Jainning aytishicha, uning muvaffaqiyati siri juda oddiy.
U musiqa yozayotganda, mashinada ketayotgan, yugurishga chiqqan yoki tunda yolgʻiz oʻtirgan odam bu qoʻshiqni eshitganda nimalarni his qilishini tasavvur qiladi.
«Men shunchaki yaxshi qoʻshiq yaratishga harakat qilaman, oʻzim tinglashni xohlaydigan, onam, singlim va rafiqam eshitishni yaxshi koʻradigan narsa yarataman», — deydi u.
«Qaysidir sababga koʻra, bizning musiqiy didimiz shunchalik mayinki, biz uni taqdim etganimizda, bularning barchasini tinglashni istovchi millionlab odamlar topiladi».
Jain Bollivud koʻmagisiz katta muxlislar auditoriyasini toʻplay oldi, vaholanki, ushbu kinoindustriya anʼanaviy ravishda hind musiqasida sanʼatkorlar uchun imkoniyatlar va yirik moliyalashtirish bilan ustuvorlik qilib kelgan.
U mamlakat kinoindustriyasi bilan bogʻliq shoʻx kino soundtreklari va dramatik balladalardan farqli ravishda oʻzgacha yoʻnalishni taklif qilayotgan mustaqil musiqachilarning yangi avlodi vakilidir.
Jainning aytishicha, u kabi sanʼatkorlar «muqobil makonda» faoliyat yuritadi.
«Biz musiqani oʻzimiz chiqaramiz va yaxshilikdan umid qilamiz», — deydi u.
Jainning AP Dhillon bilan hamkorlikdagi «Jo Tum Mere Ho» va «Afsos» qoʻshiqlari Osiyo musiqa chartlarida (Asian Music Charts) birinchi oʻringa koʻtarildi, biroq u oʻz muvaffaqiyati ortida hech qanday tayyor formula yoʻqligini aytadi.
Muayyan davrda Jain yiliga atigi bitta qoʻshiq chiqarar edi.
Uning aytishicha, u taqdim etadigan ijod namunalariga «juda injiqlik bilan» yondashadi va yaqin-yaqingacha yiliga faqat bitta qoʻshiq chiqargan.
Ammo bu vaziyat oʻzgarishi kutilmoqda va u yangi qoʻshiqlar «juda tez orada» chiqishini aytdi.
«Ular tayyor va menimcha, juda goʻzal qoʻshiqlar boʻldi, shuning uchun bu yil koʻproq musiqa eshitishingiz mumkin», — deydi u.
«Bu shunchaki bitta qoʻshiq taqdimoti boʻlmaydi, keling, bu qanday chiqishini kuzataylik».
Uning taʼkidlashicha, loyihani yakuniga yetkazish juda muhim, ehtimol shuning uchun ham u chiqaradigan qoʻshiqlariga ehtiyotkorlik bilan yondashadi.
«Hozir menda chala qolgan yoki hali yakunlamagan loyihalarim yoʻq.
«Loyihani boshladimmi, uni albatta oxiriga yetkazaman. Yaʼni, menda gʻoyalar boʻlishi mumkin, lekin yozishni boshlashim bilan uni yakunlayman».
Oddiylik ish berayotganga oʻxshaydi, Jain qoʻshiqlarining ayrim qismlari, masalan, «Arz Kiya Hai» muxlislari orasida juda ommalashib, TikTok va Instagram'da virusdek tarqaldi.
Xonanda gitara ham chaladi va chuqur tuygʻular hamda mavzulardagi qoʻshiqlari bilan tanilgan.
Soʻnggi yillarda gʻarb musiqasi va hind musiqasining eng yirik namoyandalari oʻrtasida nufuzli hamkorliklar amalga oshirildi.
Jain kattaroq yulduzlar bilan hamkorlik qilishga tayyorligini, lekin bu faqat uning oʻzligi saqlanib qolgan va hamma narsa «toʻgʻri yoʻl bilan» qilingan taqdirdagina amalga oshishini aytadi.
«Shunchaki kattaroq nom qoʻshilgani uchun qoʻshiqdagi hikoya oʻz mazmunini yoʻqotmasligi kerak», — deydi u.
Biroq u qoʻshimcha qiladi: «Men hali u darajaga yetganim yoʻq».
Shunga qaramay, Jain «Official Singles Chart» va «Official Asian Music Chart» chartlarida muvaffaqiyat qozongan «One Direction» guruhining sobiq aʼzosi Zayn Malik bilan hamkorlik qilishni tasavvur qila olishini aytadi.
«U men yaratadigan musiqa turi bilan juda yaxshi chiqisha oladigan inson boʻlardi», — deydi Jain.
«Balki koinot buni amalga oshirar».