Hayot Inog‘omov Toshkentning Chilonzor tumani hokimi etib tasdiqlandi
Toshkentning Yangihayot tumaniga qariyb olti yil rahbarlik qilgan Hayot Inog‘omov Chilonzor tumani hokimi etib tayinlandi. U bu lavozimda 2022-yil avgustidan buyon tumanni boshqarib kelgan Saidqahhor Xolxo‘jayevning o‘rnini egalladi.
Hayot Inog‘omov Toshkentning Chilonzor tumani hokimi etib tasdiqlandi
Hayot Ilyasovich Inog‘omov Toshkent shahri Chilonzor tumani hokimi lavozimiga tasdiqlandi.
Ungacha u Yangihayot tumani hokimi sifatida faoliyat yuritgan va 2020-yil noyabridan beri, ya’ni tuman tashkil etilgan paytdan boshlab unga rahbarlik qilib kelgan.
Hayot Inog‘omov 1986-yilda Toshkent shahrida tug‘ilgan. 2006-yilda Toshkent avtomobil yo‘llari institutini, 2008-yilda esa shu oliygoh magistraturasini tamomlagan.
U turli yillarda transport va yo‘l infratuzilmasi sohasi, shuningdek, davlat boshqaruvi tizimida mas’ul lavozimlarda ishlagan.
2020-yil 16-noyabrda Inog‘omov Toshkent shahrining Sergeli va Bektemir tumanlari, shuningdek, Toshkent viloyatining bir nechta tumanlari hududlari hisobidan tashkil etilgan Yangihayot tumanining birinchi hokimi etib tasdiqlangan edi.
Chilonzor tumani hokimi sifatida u boshqa ishga o‘tishi munosabati bilan lavozimidan ozod etilgan Saidqahhor Xolxo‘jayevning o‘rnini egalladi.
Xolxo‘jayev Chilonzor tumaniga 2022-yil avgustidan buyon — to‘rt yildan ortiq vaqt davomida rahbarlik qilib kelgan. U Investitsiyalar, sanoat va savdo vaziri o‘rinbosari lavozimini egallashi kutilmoqda.