Har ehtimolga qarshi
Irkutsk viloyatida oʻlat kasalligi ehtimoli tufayli Oʻzbekiston tayyorgarlik choralarini kuchaytirdi
Har ehtimolga qarshi
Oʻzbekiston Sanitariya-epidemiologik osoyishtalik va jamoat salomatligi qoʻmitasi Rossiyaning Irkutsk viloyatidagi vaziyatni kuzatib bormoqda. U yerda 27 yoshli ayolning oʻlimi oʻlat (chuma) kasalligining ehtimoliy holati bilan bogʻlanmoqda. Bemor yotgan shifoxonada karantin joriy etildi.
Yaqinda ijtimoiy tarmoqlar va OAVda Irkutsk viloyatida oʻta xavfli yuqumli kasallikning ehtimoliy holati haqida xabarlar tarqaldi. Xususan, ayol oʻlimining sababi oʻlatning ehtimoliy holati bilan bogʻlanmoqda. Ayolning oʻlimidan soʻng shifoxona karantinga yopildi, u bilan muloqotda boʻlgan odamlar esa izolyatsiya qilinib, shifokorlar nazoratiga olindi. Mutaxassislar oʻlim sababi va infektsiyaning kelib chiqishini aniqlamoqdalar.
Oʻzbekiston Sanitariya-epidemiologik qoʻmitasi Rossiyaning vakolatli organlari va Jahon sogʻliqni saqlash tashkilotining rasmiy vakillari bilan birgalikda vaziyatni kuzatib borayotganini maʼlum qildi.
Idoraning aniqlik kiritishicha, tashxis laboratoriya sharoitida tasdiqlanganmi-yoʻqmi, infektsiyaning ehtimoliy manbalari va yuqish yoʻllari, bemorning harakatlanish yoʻnalishi, shuningdek, u bilan muloqotda boʻlgan shaxslar doirasi oʻrganilmoqda. Shu bilan birga, Oʻzbekiston hududida infektsiyaning kirib kelishi va tarqalishi holatlariga qarshi xizmatlarning shayligi kuchaytirildi.
Sanepidqoʻmita fuqarolarni tekshirilmagan xabarlarga ishonmaslikka va maʼlumotlarni faqat rasmiy manbalar orqali kuzatib borishga chaqirdi. Agar vaziyat oʻzgarsa, rasmiylar bu haqda qoʻshimcha maʼlumot berishni vaʼda qilmoqda.
Bundan avvalroq mutaxassislar Rossiya va Moʻgʻuliston chegarasida oʻlatning tabiiy oʻchogʻi faollashganini qayd etgan edilar.