Grin River kolleji Oʻzbekistonda oʻz filialini ochishni koʻrib chiqmoqda
Vashington shtatidagi davlat jamoat kolleji boʻlmish Green River College Oʻzbekistonda oʻz filialini ochish va qoʻshma taʼlim dasturlarini yoʻlga qoʻyishni koʻrib chiqmoqda.
Green River College Oʻzbekistonda oʻz kampusini ochish imkoniyatini koʻrib chiqmoqda
Oʻzbekiston tomoni kollejga amalga oshirilayotgan taʼlim islohotlari, yoshlarni kasb-hunarga yoʻnaltirishni takomillashtirish, amaliy mashgʻulotlarni kengaytirish va xorijiy taʼlim muassasalari bilan sheriklik aloqalarini oʻrnatish borasidagi qadamlar haqida maʼlumot berdi. Green River College rahbariyati islohotlarni olqishladi va oʻzbekistonlik hamkorlar bilan ishlashga tayyorligini bildirdi.
Taklif etilayotgan «1+1+2» taʼlim modeliga alohida eʼtibor qaratildi. Ushbu rejaga koʻra, talabalar birinchi yilni Green River College’ning Oʻzbekistondagi kampusida, ikkinchi yilni kollejning AQShdagi kampusida, uchinchi va toʻrtinchi yillarni esa bakalavr darajasini olish uchun Amerika universitetida oʻqiydilar.
Kollej vakillarining taʼkidlashicha, agar talabalar qabul, yosh, ingliz tilini bilish va akademik talablarga javob bersalar, ushbu model toʻqqizinchi sinfni tamomlagan oʻquvchilarga oʻrta taʼlimni kollej darajasidagi taʼlim bilan birlashtirish hamda maktab taʼlimi va bakalavr darajasini toʻrt yil ichida yakunlash imkonini berishi mumkin.
Muhokamalar, shuningdek, axborot texnologiyalari, dasturiy taʼminotni ishlab chiqish, kiberxavfsizlik, buxgalteriya hisobi va aviatsiya sohalaridagi qoʻshma dasturlarni, shuningdek, talabalar va oʻqituvchilar almashinuvini ham qamrab oldi.
Green River College rasmiylari Oʻzbekistondagi manfaatdor taʼlim muassasalari bilan toʻgʻridan-toʻgʻri hamkorlik oʻrnatishga tayyor ekanliklarini maʼlum qilishdi.
Green River College oʻz faoliyatini 1945 yilda kattalar uchun kechki taʼlim dasturi sifatida boshlagan va 1964 yil sentyabr oyida texnik va kasb-hunar dasturlarini taklif qiluvchi jamoat kolleji sifatida rasman tashkil etilgan.
Bugungi kunda kollej oʻqishni koʻchirish dasturlari, kasbiy va texnik taʼlim, amaliy bakalavriat darajalari, tayyorlov kurslari hamda jamoatchilik va uzluksiz taʼlim dasturlarini taqdim etadi. Unda 15 000 ga yaqin talaba tahsil oladi.