Gretsiyada 82 yoshli erkak sohilda shezlong ustida 76 yoshli erkak bilan boʻlgan mushtlashuvdan keyin vafot etdi
Bir guvohning aytishicha, voqea joyida shunchalik tartibsizlik yuzaga kelganki, sohilning narigi chekkasidan ham chinqiriqlar eshitilib turgan.
Gretsiyada 82 yoshli erkak sohilda shezlong ustida 76 yoshli erkak bilan sodir boʻlgan mushtlashuvdan keyin vafot etdi
Gretsiyadagi sohillardan birida shezlong ustida 70 yoshlardagi erkak bilan sodir boʻlgan toʻqnashuvdan keyin 82 yoshli erkak vafot etdi, deb xabar bermoqda mahalliy OAV.
Guvohlarning aytishicha, Afina yaqinidagi Vuliagmeni sohilida shezlonglardan foydalanish ustidagi bahs zoʻravonlik bilan kechgan janjalga aylanib ketgan, keyinchalik u yanada avj olib, unga boshqa odamlar ham qoʻshilgan.
Voqea guvohlaridan biri «Kathimerini» gazetasiga bergan intervyusida voqea joyi shu qadar tartibsiz boʻlganidan, sohilning narigi chekkasidan ham baqir-chaqirlar eshitilib turganini aytdi.
Xabar qilinishicha, yoshi kichikroq boʻlgan 76 yoshli erkak hibsga olingan. U bilan birga boʻlgan 21 yoshli ayol ham ushlangan, biroq keyinroq qoʻyib yuborilgan. Guvohlar «Ta Nea» kundalik gazetasiga ayolning yuzi qon va shishgan holatda boʻlganini aytishdi.
Mushtlashuv paytida 82 yoshli erkak hushini yoʻqotib yiqilgan. Turli xabarlarga koʻra, tez yordam mashinasi yetib kelgunga qadar unga yurak-oʻpka reanimatsiyasi qilingan va defibrillyator ishlatilgan. U shifoxonaga olib borilgan va oʻsha yerda vafot etgan.
Boshqa bir guvohning aytishicha, jabrlanuvchi boshqa odamlarni kutayotgan boʻlgan va shezlongni band qilib qoʻygan, bu esa kelishmovchilikning asl sababi boʻlgan koʻrinadi.
Huquq-tartibot idoralari jismoniy toʻqnashuvga nima sabab boʻlgani va erkakning oʻlimiga nima olib kelganini oʻrganmoqda.