Grand-Kanonda kuchli toshqin: turistik yoʻnalishlar yopildi
AQShning Arizona shtatidagi Grand-Kanonda milliy bogʻida kuchli suv toshqini sodir boʻldi. Tabiiy ofatdan keyin qutqaruvchilar bir necha kishining qayerdaligini aniqlashga harakat qilmoqda, oʻnlab odamlar esa xavfli hududdan evakuatsiya qilingan.
Grand-Kanonda kuchli sel tufayli sayyohlik yoʻnalishlari yopildi
29-avgust kuni Grand-Kanon milliy bogʻining Brayt-Enjel kanoni va Fantom-Ranch hududlarida kuchli yomgʻirlar natijasida yuzaga kelgan toʻsatdan toshqin jiddiy vayronagarchiliklarga sabab boʻldi. Suv oqimi Kolorado daryosiga ulkan toshlar, metall konstruksiyalar va boshqa chiqindilarni olib keldi.
AQSH Milliy parklar xizmati dastlab 20 dan ortiq kishi bilan aloqa yoʻqolganini maʼlum qildi, keyinchalik esa rasmiylar 15 nafar shaxsning qayerdaligini aniqlashga harakat qilayotganini bildirdi. Biroq, ularning barchasi toʻgʻridan-toʻgʻri toshqin qurboni boʻlgani tasdiqlanmagan; baʼzilari xavfsiz joyda boʻlishi, ammo aloqa imkoniyati boʻlmasligi mumkin.
Milliy park maʼmuriyati 29-avgust kuni Brayt-Enjel-Krik boʻylab, Shimoliy Kaybab yoʻlida, Brayt-Enjel kempingi, Fantom-Ranch yoki uning shimolidagi The Box deb nomlanuvchi hududda boʻlgan sayyohlar haqida maʼlumotga ega boʻlganlardan qutqaruv xizmatlariga murojaat qilishni soʻradi.
Toshqindan soʻng kamida 62 kishi havo orqali evakuatsiya qilindi. Qutqaruv ishlariga Milliy parklar xizmati xodimlari bilan birga Arizona jamoat xavfsizligi departamenti ham jalb etildi.
Suv oqimi Brayt-Enjel-Krik ustidagi deyarli barcha piyodalar koʻpriklarini vayron qildi, bu esa soyning bir qirgʻogʻidan ikkinchisiga oʻtishni imkonsiz qildi. Toshqin yoʻllar, koʻpriklar va boshqa sayyohlik infratuzilmasiga ham katta zarar yetkazdi.
Bundan tashqari, ofat milliy bogʻdagi sayyohlar va doimiy yashovchilarni suv bilan taʼminlaydigan asosiy quvurga shikast yetkazdi. Shu sababli park maʼmuriyati suvni tejashga chaqirdi va sayyohlar uchun ayrim mehmonxona va yotoq joylaridan foydalanishni chekladi.
Fantom-Ranch, Brayt-Enjel kempingi va Shimoliy Kaybab sayyohlik yoʻli keyingi xabarga qadar yopildi. Kolorado daryosiga metall konstruksiyalar va boshqa yirik chiqindilar tushgani sababli daryoda harakatlanish va rafting ham vaqtincha toʻxtatildi.
Meteorologik maʼlumotlarga koʻra, kuchli yogʻingarchilik juda qisqa vaqt ichida tushgan. Tik qoyalar va balandlikning keskin oʻzgarishi suvning pastga katta tezlikda oqib tushishiga sabab boʻlib, toʻsatdan kuchli sel oqimini yuzaga keltirgan.
Hududda yana kuchli yomgʻir va momaqaldiroq boʻlishi prognoz qilingani sababli yangi toshqinlar, sel va tosh koʻchishi xavfi saqlanib qolmoqda. Sayyohlardan yopilgan hududlarga kirmaslik va qutqaruv xizmatlari koʻrsatmalariga amal qilish soʻralgan.