Gol oʻrniga qizil. Vinisius yana mojaro markazida
Braziliyalik vinger endi klasikoni oʻtkazib yuborishi mumkin.
Gol o‘rniga qizil: Vinisius yana mojaro markazida
La liganing 8-turida «Real» va «Vilyarreal» o‘rtasidagi uchrashuv (1:0) katta bahsga sabab bo‘ldi. O‘yinning 71-daqiqasida madridliklar hujumchisi Vinisius Junior gol urdi, biroq gol bekor qilindi va futbolchining o‘zi maydondan chetlatildi.
Yozda «Arsenal»ga o‘tib ketishi mumkin bo‘lgan, oxir-oqibat Madrid klubi bilan shartnomasini yangilagan Vinisius mavsum boshida ishonchsiz o‘ynamoqda. Shu sabab Joze Mourinio uni ilk bor zaxirada qoldirdi. Buni tushunsa bo‘ladi: braziliyalik forvard bu mavsum barcha turnirlar doirasidagi to‘qqiz o‘yinda atigi bir gol urgan. Natijada boshlang‘ich tarkibda uning o‘rniga Yan Diomande tushirildi.
Yulduzli braziliyalik baribir 52-daqiqada zaxiradan maydonga tushdi, ammo bevosita o‘z raqobatchisi o‘rniga emas, himoyachi Trent Aleksandr-Arnoldni almashtirdi. Albatta, u himoyada o‘ynamadi va hujumning chap qanotiga joylashdi. 62-daqiqada esa u tushgach o‘ng qanotga ko‘chgan Diomande hisobni ochdi — bu ivuarlik vingerning «Real» safidagi debyut goli bo‘ldi.
Dastlab hakam golni hisobga olmagandi, biroq VAR aralashuvidan so‘ng hujumda hech qanday qoidabuzarlik bo‘lmagani tasdiqlandi.
Ammo videohakamlarning keyingi aralashuvi «Real» zarariga ishladi. 71-daqiqada Vinisius ham darvozani ishg‘ol etib, raqibiga javob qaytargandi, ammo yakun uning uchun yomon bo‘ldi.
Holbuki Joze Mourinio qizil olish xavfiga qaramay, 26 yoshli futbolchisini tabriklash uchun maydonga chiqib kelgandi (u avvalroq hakam bilan bahslashgani uchun sariq kartochka olgan edi).