Giyohvandlik va psixotrop moddalarga oid me’yorlar yangilandi
O‘zbekistonda giyohvandlik vositalari, psixotrop moddalar va ularning analoglariga oid ayrim idoraviy normativ-huquqiy hujjatlarga o‘zgartirishlar kiritildi. Tuzatishlar dorixonalarda «angro» mahsulotlarini qadoqlash va realizatsiya qilish, shuningdek, tibbiyot tashkilotlarida dori vositalarini tayinlash va retseptlarni rasmiylashtirishga oid me’yorlarni qamrab oldi.
Giyohvandlik va psixotrop moddalarga oid me’yorlar yangilandi.
Sog‘liqni saqlash vazirining 2026-yil 31-iyuldagi 25-sonli buyrug‘iga asosan, vazirlik tomonidan qabul qilingan ayrim idoraviy normativ-huquqiy hujjatlarga o‘zgartirishlar kiritildi. Ushbu hujjat 7-avgust kuni Adliya vazirligida 3919-son bilan davlat ro‘yxatidan o‘tkazildi.
Kiritilgan o‘zgartirishlar 2026-yil 11-iyunda qabul qilingan, giyohvandlik vositalari, psixotrop moddalar yoki ularning analoglari hamda kuchli ta’sir qiluvchi moddalarning qonunga xilof muomalasi uchun javobgarlikni takomillashtirishga qaratilgan qonunga muvofiq amalga oshirildi.
Jumladan, 2018-yilda tasdiqlangan dorixona sharoitida "angro" mahsulotini qadoqlash, o‘rash, markirovka va realizatsiya qilish tartibi to‘g‘risidagi nizomga o‘zgartirish kiritildi. Undagi "giyohvandlik vositalari va ularning analoglari, psixotrop moddalar" so‘zlari "giyohvandlik vositalari, psixotrop moddalar yoki ularning analoglari" tarzida yangilandi.
Shuningdek, tibbiyot tashkilotlarida dori vositalarini tayinlash, xalqaro patentlanmagan nomlanishi bo‘yicha retseptlarni rasmiylashtirish hamda bemorning dori vositalarini qabul qilish, saqlash va qo‘llash tartibi to‘g‘risidagi nizomga ham xuddi shunday o‘zgartirish kiritildi.
Mazkur buyruq rasmiy e’lon qilingan kundan e’tiboran kuchga kiradi.