«Giyohvand moddalardan uzoq yuring» — Uoterforddagi yongʻin qurbonlarining oilasi ogohlantiradi

«Narkotiklardan uzoqroq boʻling», — demoqda Uoterforddagi oʻt qoʻyish qurbonlarining oilasi

Oʻtgan hafta Irlandiyadagi xonadonlardan birida sodir etilgan oʻt qoʻyish jinoyati oqibatida halok boʻlgan bir oilaning toʻrt aʼzosining qarindoshi yoshlarni «narkotiklardan uzoqroq boʻlishga» chaqirdi.

Ota-ona Filip va Kim Inglishlar hamda ularning ikki farzandi — 12 yoshli Kallum va toʻqqiz yoshli Jeyden Uoterforddagi Birchvud mavzesida joylashgan xonadonida chiqqan yongʻinda halok boʻldi.

Yongʻin chiqqan vaqtda uyda boʻlgan er-xotinning qolgan ikki farzandi kasaxonada qolmoqda, ularning ahvoli ogʻir.

Garda (Irlandiya politsiyasi) ushbu oʻt qoʻyish holati narkotik qarzlari boʻyicha qoʻrqitish bilan bogʻliq deb hisoblamoqda. Filip Inglishning oʻgʻli Irlandiyaning RTÉ teleradiokompaniyasiga maʼlum qilishicha, ular boshqa bir shaxsning narkotik qarzi sababli nishonga olingan.

Shanba kuni ikki kishi ushbu hujumga aloqadorlikda ayblanib sud oldida javob berdi.

Shahardagi Muqaddas Yurak cherkovida oʻtkazilgan dafn marosimida yuzlab motamsarolar qatnashdi va marosimdan soʻng oila Kilbarri qabristoniga dafn etildi.

Ibodat vaqtida cherkovning toʻrida toʻrtta tobut — ikkita oq va ikkita och jigarrang tobut joylashtirildi.

Inglishlar oilasining olti aʼzosi, jumladan, kasalxonada ogʻir ahvolda yotgan ikki farzandi aks etgan oilaviy fotosurat tobutlar yonidagi stolga toʻrtta oq sham bilan birga qoʻyildi.

Ibodat yakuniga yaqinlashganda, Filipning kuyavi Raymond Pauer «shahrimiz va mamlakatimizdagi» yoshlarga murojaat qildi.

«Iltimos, narkotiklardan uzoqroq boʻling», — dedi u yigʻilganlarga.

«Giyohvandlikka duch kelganingizda, iltimos, yordam soʻrang. Chalgʻib, yomon yoʻlga kirib ketayotgan boʻlsangiz, iltimos, yordam soʻrang. Iltimos, hayotni tanlang, umidni tanlang va, albatta, kelajakni tanlang».

Ibodatni prixod rohibi ota Jerri Chestnutt olib bordi, unda Irlandiya Prezidenti Katrin Konnolli, Taoiseach (Irlandiya Bosh vaziri) Mixol Martin va Tanaiste (Irlandiya Bosh vaziri oʻrinbosari) Saymon Xarrisning adyutantlari ishtirok etdi.

Dafn marosimida mahalliy siyosatchilar, jumladan, mahalliy TD (Irlandiya parlamenti aʼzosi) va kichik vazir Jon Kammins, shuningdek, Shinn Feyn yetakchisi Meri Lu Makdonald ham qatnashdi.

Yaqinlaridan ayrilgan oila aʼzolari tomonidan mehrobga keltirilgan sovgʻalar Jeyden uchun Minecraft futbolkasi va oʻyinchoqlar, Kallum uchun GAA klubi futbolkasi, Filip uchun Liverpul futbolkasi va Carlsberg pivosi bankasi hamda Kim uchun lala guldastasi boʻldi.

Ota Chestnutt jamoatning «qalbi vayron boʻlganini» aytdi va halok boʻlgan toʻrt kishini «zaminning sarasi» deb taʼrifladi.

«Sizlarni taniganimiz uchun hammamiz yaxshiroq insonga aylandik, chunki sizlar zaminning sarasi va ushbu jamoatning nuri edinglar», — dedi u motamsarolarga.

«Oʻtgan seshanba ertalab sodir boʻlgan mutlaq yovuzlik harakati bir oila va jamoatni vayron qildi va qalbini yordi».

Uning aytishicha, «zulm kuchlari» toʻrt nafar begunoh insonning umriga zomin boʻlgan va jamoat «qaygʻu, shok, vayronlik va ha, gʻazabni» his qilmoqda.

Uning taʼkidlashicha, Filip va Kimning butun eʼtibori farzandlariga qaratilgan edi, chunki ularning uch farzandi xastalikdan aziyat chekardi.

Ibodat paytida Filip «shaxdon, suyumli, aqlli va gʻamxoʻr» inson sifatida, mahalliy supermarketga va prixod atrofiga borganida odamlarni suhbatlashish uchun toʻxtatib qoladigan inson sifatida yodga olindi.

Kim esa «ochiqkoʻngil», «jizzaki» va «eng mehribon, samimiy hamda gʻamxoʻr inson» sifatida yodga olindi.

«Ota-ona sifatida ular farzandlarini juda yaxshi koʻrishardi. Ularning oilaviy hayoti mehr-muhabbat sayohati edi. Va uchta farzandi xastalikka duch kelgani sababli koʻplab qiyinchiliklar boʻlgan. Ammo shunga qaramay, oila sifatida ular toʻliq ahil va sadoqatli edilar».

Kallum «zirek tabassumli» va «hamma tomonidan sevilgan» bola sifatida yodga olindi.

«Oftobni toʻsgan qora qilmish hayotingizni oldi, lekin nuringiz abadiy porlaydi. Chunki qalbimizda siz yulduzsiz va siz gʻolibsiz», — dedi rohib motamsarolarga.

Jeyden «mehr-muhabbat kuchi» sifatida yodga olindi, u tugʻilganda uning energiyasi «dunyoga joʻsh urib kirib kelgan edi».