Germaniyada 12,5 ming o‘lim jazirama bilan bog‘landi
Germaniyada 2026-yil boshidan 2-avgustga qadar jazirama issiq bilan bog‘liq erta o‘limlar soni qariyb 12,5 mingtaga yetdi. Robert Kox instituti (RKI) ma’lumotlariga ko‘ra, bu so‘nggi 10 yildagi eng yuqori ko‘rsatkich hisoblanadi.
Germaniyada bu yilgi g‘ayritabiiy issiq ob-havo tufayli vafot etganlar soni sezilarli darajada oshdi. Robert Kox institutining 13-avgustdagi haftalik hisobotida keltirilishicha, 2-avgust holatiga ko‘ra, jazirama bilan bog‘liq taxminan 12,5 mingta muddatidan oldin o‘lim qayd etilgan.
Mutaxassislar bu baholash konservativ hisob-kitoblarga asoslanganini ta’kidlamoqda, shuning uchun amalda yuqori harorat ta’siri bilan bog‘liq o‘limlar soni bundan ham ko‘p bo‘lishi mumkin.
RKI ma’lumotlariga ko‘ra, 2026-yilgi ko‘rsatkich so‘nggi o‘n yillikdagi eng yuqori natijadir. Bungacha 2018-yilda jazirama oqibatida taxminan 9,4 ming, 2019-yilda esa 7,7 ming kishi vafot etgani hisoblangan.
Hududlar kesimida anomal issiqdan eng ko‘p Saar va Reynland-Pfals federal yerlari aholisi jabrlangan. Saarda har 100 ming aholiga 43,4 ta, Reynland-Pfalsda esa 38,7 ta issiq bilan bog‘liq o‘lim to‘g‘ri kelgan. Germaniya bo‘yicha o‘rtacha ko‘rsatkich har 100 ming kishiga 15 ta o‘limni tashkil etgan.
Statistika jazirama ayniqsa keksa yoshdagilar uchun katta xavf tug‘dirganini ko‘rsatmoqda. 2026-yilda issiq bilan bog‘liq o‘limlarning qariyb 6,3 mingtasi 85 yosh va undan katta bo‘lgan fuqarolar hissasiga to‘g‘ri kelgan. 75 yoshdan 84 yoshgacha bo‘lganlar orasida esa 3,1 mingdan ziyod kishi jazirama oqibatida vafot etgani baholanmoqda.
Ayni paytda Germaniyaga yana bir issiq havo to‘lqini kirib kelgan. Biroq u iyun oyi oxirida kuzatilgan jaziramaga nisbatan kuchsizroq. O‘sha paytda mamlakatning ko‘plab hududlarida havo harorati 40 darajadan yuqori ko‘tarilgan edi. RKI hisob-kitoblariga ko‘ra, faqat iyun oyidagi jazirama Germaniyada qariyb 5,1 ming kishining o‘limi bilan bog‘liq bo‘lgan.
AFP hisob-kitoblariga ko‘ra, shu oyning o‘zida Yevropa bo‘ylab kamida 12 mingta ortiqcha o‘lim yuqori harorat bilan bog‘liq bo‘lishi mumkin. 2026-yilning iyun va iyul oylari G‘arbiy Yevropada kuzatuvlar tarixidagi eng issiq oylar bo‘ldi. Yevropa Ittifoqining Copernicus iqlim o‘zgarishi xizmati ma’lumotlariga ko‘ra, ushbu davrda o‘rtacha harorat 1991–2020-yillardagi ko‘rsatkichdan 2,79 daraja yuqori bo‘lgan.
Germaniyaning sobiq sog‘liqni saqlash vaziri Karl Lauterbax anomal issiq oqibatlariga qarshi kurash choralarini kuchaytirishga chaqirdi. U butun mamlakat bo‘ylab jazirama bilan bog‘liq xavflar haqida ma’lumot beruvchi maxsus portallar va tezkor telefon liniyalarini joriy etishni taklif qilgan. Germaniya Atrof-muhit va iqlimni muhofaza qilish federal vazirligi davlat kotibi Yoxen Flasbart esa 2027-yil yoziga qadar ekstremal issiqqa qarshi milliy reja ishlab chiqish tarafdori ekanini bildirgan.
Germaniya shaharlari uyushmasi rahbari, Leypsig ober-burgomistri Burkxard Yung jazirama va iqlim o‘zgarishi oqibatlariga qarshi choralarni moliyalashtirish masalasini mamlakat Asosiy qonunida belgilab qo‘yishga chaqirgan. Shu bilan birga, Germaniya kasalxonalar jamiyati tibbiyot muassasalarida sovitish tizimlarini modernizatsiya qilish zaruratiga e’tibor qaratdi. Tashkilot ma’lumotlariga ko‘ra, hozir Germaniya shifoxonalaridagi palatalarning faqat kichik qismi konditsionerlar bilan jihozlangan.