Germaniyada 12 mingdan ziyod kishi harbiy xizmatni rad etish uchun ariza berdi
Germaniyada 2026-yilning dastlabki sakkiz oyida harbiy xizmatni rad etish boʻyicha 12 102 ta ariza kelib tushgan. Bu oʻtgan yil davomida qayd etilgan jami koʻrsatkichdan uch baravardan ziyod. Oʻsish xavfsizlik bilan bogʻliq vaziyatning keskinlashuvi va yoshlarga harbiy xizmat haqida anketalar yuborila boshlangani bilan izohlanmoqda.
Germaniyada 12 mingdan ortiq odam harbiy xizmatdan bosh tortish uchun ariza topshirdi
Funke mediaguruhining Federal oila va fuqarolik jamiyati masalalari idorasi — BAFzA ma’lumotlariga tayangan holda xabar berishicha, 2025-yil davomida harbiy xizmatdan voz kechish bo‘yicha 3 879 ta ariza kelib tushgan. Joriy yilning yanvar–avgust oylarida esa bu ko‘rsatkich 12 mingdan oshgan.
Idora vakili aytishicha, ariza beruvchilar hujjatlarni to‘ldirishda ko‘p hollarda xatolarga yo‘l qo‘ymoqda. Ayrim murojaatlarning mazmuni harbiy xizmatdan bosh tortishni asosli deb topish talablariga mos kelmagani sababli ular ko‘rib chiqilmasdan qaytarilmoqda. Demak, kelib tushgan arizalarning hammasi ham qanoatlantirilmagan.
Germaniyada harbiy xizmat tizimini isloh qilish haqidagi qonun 2026-yil 1-yanvardan kuchga kirgan. Unga ko‘ra, 18 yoshga to‘lgan yigit va qizlarga armiyada xizmat qilishga tayyorligi hamda yaroqliligini aniqlash uchun anketa yuborilmoqda. Yigitlar uni to‘ldirishi majburiy, qizlar uchun esa javob berish ixtiyoriy.
Mamlakatda 2011-yildan beri to‘xtatib qo‘yilgan majburiy harbiy xizmat hozircha qayta joriy etilmagan. Biroq ko‘ngillilar soni belgilangan ehtiyojni qoplamasa, Bundestag alohida qonun orqali «ehtiyojga qarab majburiy harbiy xizmat» tartibini joriy etishi mumkin. Germaniya 2035-yilga borib faol harbiylar sonini 260 mingga yetkazishni rejalashtirmoqda.
Majburiy xizmatning qayta tiklanishi ehtimoli yoshlar orasida noroziliklarga ham sabab bo‘lmoqda. Sentabr oyida mamlakatning bir qator shaharlarida maktab o‘quvchilari ishtirokida yirik norozilik namoyishlari o‘tkazilgan.
Bundesver esa yangi xizmatchilarni jalb qilish usullarini kengaytirmoqda. Jumladan, qurolli kuchlar Kyolnda o‘tkaziladigan dunyodagi eng yirik videoo‘yin ko‘rgazmalaridan biri — Gamescom’da ham o‘z stendi bilan qatnashmoqda.
Shu bilan birga, Germaniya Mudofaa vazirligi armiyada xizmat qilayotganlar soni ham oshganini ma’lum qilgan. 2026-yil iyul oxirida Bundesver safida 186 700 nafar harbiy bo‘lgan. Bu so‘nggi 13 yildagi eng yuqori ko‘rsatkich bo‘lib, o‘tgan yilning shu davriga nisbatan 3 700 nafarga ko‘p.
Bundesverning rasmiy ma’lumotiga ko‘ra, iyul oxirigacha qariyb 378 mingta anketa yuborilgan, 2 630 nafar nomzod esa xizmatga yaroqlilikni baholash jarayonidan o‘tgan. Shu vaqtgacha harbiy xizmatga kirish uchun kelib tushgan arizalar soni 47 300 taga yetgan — bu o‘tgan yilning mos davriga nisbatan 26 foiz ko‘p.