Germaniya harbiy xizmat yoshidagi ukrainalik erkaklarni Kiyevga qaytarmoqchi
Germaniya harbiy xizmat yoshidagi ukrainalik erkaklarni Kiyevga qaytarishda yordam berishi mumkin
Germaniya hukumati o‘z hududida yashayotgan harbiy yoshdagi erkaklarni Ukrainaga qaytarish masalasida Kiyevga ko‘maklashishi ehtimoli bor.
Vazir 9-sentyabr kuni e’lon qilingan intervyuda Berlin Germaniyada yashash ruxsatnomasiga ega ukrainalik erkaklar haqidagi ma’lumotlarni Kiyev bilan ulashishi mumkinligini aytdi.
“Biz bu yerda kim yashashini bilamiz. Masalan, kim ijtimoiy nafaqa oladi yoki kim ro‘yxatdan o‘tgan”, dedi Vadeful.
Ta’kidlanishicha, shu ma’lumotlar asosida Ukraina hukumati fuqarolar bilan bog‘lanib, ularni xizmatga chaqirishi mumkin. Vazir bu jarayon zo‘rlovsiz amalga oshirilishi kerakligini ham qo‘shimcha qildi.
Rasmiy ma’lumotlarga ko‘ra, Rossiyaning keng ko‘lamli bosqinidan keyin qariyb 1 million ukrainalik Germaniyada vaqtinchalik yashash ruxsatnomasini olgan. Ularning taxminan 450 ming nafari erkaklardir.
Ukrainada 2022-yil fevralidan beri harbiy holat amal qiladi. Unga ko‘ra, 25 yoshdan 60 yoshgacha bo‘lgan harbiy xizmatga yaroqli erkaklarning mamlakatdan chiqib ketishi taqiqlangan. Hozirda Yevropa Ittifoqi bo‘ylab 1,17 millionga yaqin voyaga yetgan ukrainalik erkak vaqtinchalik himoyadan foydalanmoqda. Ularning xorijda bo‘lishi Kiyev, Bryussel va Yevropa poytaxtlari o‘rtasida muhokama qilinmoqda.
Germaniya kansleri Fridrix Merts 2025-yil noyabr oyida Ukraina prezidenti Vladimir Zelenskiyni yosh yigitlarning mamlakatdan chiqib ketishini cheklashga chaqirgan edi. Shuningdek, 2026-yil aprel oyida Zelenskiy Merts bilan o‘tkazilgan matbuot anjumanida harbiy yoshdagi erkaklarning qaytishi adolat mezonidir, deb ta’kidlagan edi.
Iyul oyida Yevropa Ittifoqi Ukrainaning harbiy ehtiyojlaridan kelib chiqib harbiy yoshdagi erkaklarni qochqinlarga boshpana berish dasturidan chiqarib tashlagan. Bu taqiq faqat yangi murojaat qiluvchilarga tegishli bo‘lib, Yevropa Ittifoqida yashayotgan erkaklarga taalluqli emas.