Germaniya 23 nafar afgʻonistonlikni Kobulga qaytardi
Germaniya 23 nafar Afgʻoniston fuqarosini charter reysi orqali Kobulga deportatsiya qildi. Mamlakat Ichki ishlar vazirligiga koʻra, ularning aksariyati ogʻir jinoyatlar, jumladan, jinsiy zoʻravonlik va tan jarohati yetkazish bilan bogʻliq jinoyatlar uchun sudlangan. Amaldagi Germaniya hukumati davrida Afgʻonistonga chiqarib yuborilganlar soni 228 nafarga yetdi.
**Germaniya 23 nafar afgʻonistonlikni Kobulga qaytardi**
Germaniya Ichki ishlar vazirligi 25-avgust kuni Leypsig/Galle aeroportidan Afgʻoniston poytaxti Kobulga maxsus charter reysi orqali 23 nafar afgʻonistonlik erkakni deportatsiya qilganini maʼlum qildi. Ushbu shaxslar Germaniyadan chiqarib yuborilishi lozim boʻlgan.
Vazirlikning xabar berishicha, deportatsiya qilinganlarning aksariyati ogʻir jinoyatlar, jumladan, jinsiy zoʻravonlik va tan jarohati yetkazish bilan bogʻliq jinoyatlar uchun sudlangan. Germaniya IIV vakili AFP agentligiga qolgan shaxslar ham avval huquqni muhofaza qiluvchi organlar eʼtiboriga tushganini taʼkidladi. Vazirlik deportatsiya jarayoni muvaffaqiyatli yakunlanganini bildirdi.
25-avgustdagi reysni hisobga olganda, Germaniyaning amaldagi hukumati davrida mamlakatdan Afgʻonistonga deportatsiya qilingan erkaklar soni 228 nafarga yetdi.
Germaniya ichki ishlar vaziri Aleksander Dobrindt mamlakatda qolish huquqiga ega boʻlmagan shaxslar Germaniyani tark etishi shartligini taʼkidladi. Uning soʻzlariga koʻra, jinoyat sodir etgan shaxslarni mamlakatdan chiqarib yuborish jamiyat manfaatlariga mos keladi va hukumat bu siyosatni izchil davom ettiradi.
Kobulga reys amalga oshirilishidan bir kun avval Leypsig/Galle aeroportida Afgʻoniston fuqarolarini deportatsiya qilishga qarshi aksiya boʻlib oʻtdi. Deportatsiyaga qarshi faollar Afgʻonistonga qaytarilayotgan odamlar "Tolibon" hukmronligi ostida taʼqib, qiynoq yoki boshqa jiddiy xavflarga duch kelishi mumkinligini bildirishdi. "Deportatsiyalarga qarshi alyans" vakili Kay Adil Germaniyadan himoya izlayotgan afgʻonistonliklarni "Tolibon" hukmronligidagi mamlakatga qaytarish insonlar hayoti va xavfsizligi uchun tahdid tugʻdirishi mumkinligini taʼkidladi.
"Tolibon" harakati 2021-yil yozida Afgʻonistonda hokimiyatni egallaganidan soʻng Germaniya ushbu mamlakat fuqarolarini deportatsiya qilishni toʻxtatgan edi. Afgʻonistonga deportatsiyalar 2024-yil avgust oyida qayta tiklandi. Oʻshanda Germaniyadan Kobulga jinoyat sodir etgani uchun sudlangan 28 nafar Afgʻoniston fuqarosi yuborilgan edi.