Gelenjikda AYoQShda benzin tugab qoldi
Rossiyaning Gelenjik shahri va uning atrofidagi avtomobillarga yonilgʻi quyish shoxobchalarida benzin tugab qoldi. 21-avgust kechasiga kelib Arxipo-Osipovka qishlogʻidagi soʻnggi AYoQShda ham AI-92 va AI-95 benzini qolmagan. Ayrim shoxobchalarda yuzlab avtomobillardan iborat navbatlar yuzaga kelgan.
Gelendjikda yoqilg‘i tugadi
"Vajnyye istorii" nashrining xabar berishicha, 21-avgust, juma kuni kechqurun Gelendjik va uning atrofidagi barcha yoqilg‘i quyish shoxobchalarida benzin zaxiralari butunlay tugagan. Hatto Arxipo-Osipovka qishlog‘idagi oxirgi AYoQShda ham AI-92 va AI-95 markali benzin qolmagan.
Kun davomida ayrim AYoQShlar oldida yuzlab avtomobillar navbatda turgan. "Ostorojno, novosti" Telegram-kanalining ma’lumotiga ko‘ra, ba’zi haydovchilar benzin olish uchun 16 soatdan ortiq vaqt davomida navbat kutishga majbur bo‘lganlar.
Bundan avvalroq shunga o‘xshash xabarlar Sochi va Krasnodar o‘lkasining boshqa aholi punktlaridan ham kelib tushgan edi. Sochi ma’muriyati shahardagi yoqilg‘i bilan bog‘liq vaziyatni o‘ta og‘ir deb baholab, mahalliy aholi va sayyohlarni shaxsiy avtomobillarda sayohat qilishdan imkon qadar tiyilishga chaqirgan.
Rossiyada yoqilg‘i tanqisligining yangi to‘lqini avgust oyining o‘rtalarida boshlangan. 10-15-avgust kunlari mamlakatning kamida oltita hududida benzin sotish bo‘yicha cheklovlar qayta joriy etilgan yoki avvalgi cheklovlar kuchaytirilgan.
"Izvestiya" gazetasi "GdeBenz" ma’lumotlariga tayanib xabar berishicha, 18-avgust holatiga ko‘ra, Rossiyadagi AYoQShlarning atigi 28,1 foizida benzin va dizel yonilg‘isi mavjud bo‘lgan. Bir hafta avval esa bu ko‘rsatkich 41 foizni tashkil etgan.
Manbada Rossiyadagi yoqilg‘i inqirozi Ukraina Qurolli kuchlarining neftni qayta ishlash zavodlariga muntazam zarbalari bilan bog‘langan. Vaziyat may oyi oxirida keskinlashgani aytilmoqda.
Yoqilg‘i sotish bo‘yicha turli cheklovlar Rossiyaning 40 dan ortiq hududida rasman joriy etilgan.