Gavayidagi 550 yillik mashhur Holei dengiz arkasi qulab tushdi
Vulqonlar milliy bogʻining qoyali tizmalaridan boʻrtib chiqib turgan lava jinslari oʻtgan dam olish kunlarida qulab tushdi.
Gavayining mashhur 550 yillik Holei dengiz arkasi qulab tushdi
Gavayining mashhur Holei dengiz arkasi (Hōlei Sea Arch) — taxminan 550 yil avval paydo boʻlgan, balandligi 90 fut (27,4 metr) keladigan lava jinslaridan iborat qoya — Tinch okeaniga qulab tushdi.
Qulashning aniq vaqti nomaʼlum. Milliy bogʻlar xizmati (NPS) xabariga koʻra, 23 sentyabr kuni arka Vulqonlar milliy bogʻi sohilidan suvga choʻzilib turgan edi, biroq 27 sentyabrga kelib u gʻoyib boʻlgan.
«Dengiz arkasi atrofidagi sohil chizigʻida yillar davomida beqarorlik belgilari kuzatilayotgan edi», — deyiladi NPS bayonotida. Mazkur xizmat 2021 yildayoq arka vaqt oʻtishi bilan vayron boʻlishidan ogohlantirgan edi.
Gavayi orolidagi (shuningdek, «Katta orol» sifatida ham mashhur) «Kraterlar zanjiri» yoʻlining (Chain of Craters Road) oxirida joylashgan ushbu qoya mashhur va juda koʻp suratga olinadigan sayyohlik maskani edi.
Arka oʻtgan dam olish kunlarida «Nolo» tropik boʻroni paytida bogʻ vaqtinchalik yopilgan mahalda qulab tushgan deb taxmin qilinmoqda.
Bogʻ maʼmuriyatining maʼlum qilishicha, 2018 yilda Kilauea vulqoni otilishi va uning choʻqqisi qulashi paytida yuz bergan zilzilalar arka yaqinidagi qoyalarga shikast yetkazgan edi.
Uning butunlay qulashi «bogʻning chekka va serqoya sohil chizigʻining navbatdagi evrilishi» boʻldi.
2020 yil yanvar oyida qoyalardagi yangi yoriqlar va beqarorlik tufayli bogʻ maʼmuriyati arkani tomosha qilish uchun moʻljallangan dastlabki maydonchani yopib qoʻygan edi. Bir necha oydan soʻng, NPS xabariga koʻra, xavfsizroq masofada yangi tomosha maydonchasi ochilgan.
Oʻsha yilning oxirida tropik boʻron toʻlqinlari arkaning pastki qismidan bir boʻlak toshni uzib yuborgan edi.
«Bu qoya goʻzal, ammo vaqtinchalikdir va uning umri cheklangan», — degan edi bogʻ xizmati 2021 yilda. «Dengiz arkasi vaqt oʻtishi bilan dengizga qulab tushadi. Biroq, qoya asta-sekin quruqlik ichkarisiga surilib borishi bilan uning oʻrnini boshqalari egallaydi».
Milliy bogʻlar xizmatining ijtimoiy tarmoqlardagi arka qulashi haqidagi postiga minglab odamlar layk bosib, izoh qoldirdi, jumladan, arkaga tashrif buyurganlari haqidagi xotiralari va uning suratlari bilan boʻlishdi.
«Hech narsa va hech kim bu yerda abadiy emas», — deb yozgan Facebook foydalanuvchilaridan biri. «Millionlab yillardan keyin quyosh ham soʻnadi. Yaxshilik va goʻzallikni hozir qadrlang».