Fransiya O‘zbekistonga sayyohlar oqimi bo‘yicha Yevropaning TOP-5 mamlakatlaridan biri bo‘ldi
2026-yilning sakkiz oyida Fransiyadan O‘zbekistonga 22 mingdan ortiq sayyoh keldi. Fransiya kiruvchi turizm bo‘yicha Yevropa
Fransiya O‘zbekistonga sayyohlar oqimi bo‘yicha Yevropaning TOP-5 mamlakatlari qatoriga kirdi
2026-yil yanvar–avgust oylarida Fransiyadan O‘zbekistonga 22 ming 55 nafar sayyoh tashrif buyurgan. Bu ko‘rsatkich 2025-yilning shu davriga nisbatan 20,6 foizga yuqori.
Mazkur davrdagi tashriflar soni bo‘yicha Fransiya O‘zbekistonga kiruvchi turizmda Yevropaning yetakchi besh davlati safidan joy oldi. Parij va Toshkent o‘rtasidagi to‘g‘ridan-to‘g‘ri aviaqatnovlar ham sayyohlar oqimini oshirishga xizmat qilayotgan omillardan biri bo‘lib qolmoqda.
Fransiya bilan turizm sohasidagi hamkorlik faqat sayyohlar oqimi bilan cheklanib qolmayapti. Fransuz kompaniyalari O‘zbekistondagi yirik turizm infratuzilmasi loyihalarida ham qatnashmoqda.
Tog‘ infratuzilmasiga ixtisoslashgan «MND» kompaniyasi Chimyonda to‘rt faslga mo‘ljallangan kurort barpo etish ishlariga jalb etilgan. Kanat yo‘llari ishlab chiqaruvchi «POMA» kompaniyasi esa Chimyon va Zomindagi loyihalarni ko‘rib chiqmoqda.
Bundan tashqari, bir qator fransuz kompaniyalari Beldersoy–Chimyon–Nanay xalqaro to‘rt fasllik kurorti konsepsiyasini ishlab chiqishda ishtirok etgan. Mehmonxona yo‘nalishida esa «Accor» guruhi «Mercure», «Mövenpick», «Swissôtel», «ibis» va «Novotel» brendlari orqali O‘zbekistonda faoliyat yuritmoqda.
O‘zbekistonning Parijda bo‘lib o‘tgan «IFTM Top Resa 2026» ko‘rgazmasida «Country of Honour» maqomida qatnashishi ham ikki mamlakat o‘rtasidagi turizm aloqalarini yanada kengaytirishga qaratildi.
Ko‘rgazma doirasida O‘zbekiston Respublikasi Turizm qo‘mitasi mamlakatning Fransiyadagi elchixonasi bilan birgalikda milliy turizm salohiyatini taqdim etdi. Dasturda O‘zbekiston, Fransiya va boshqa davlatlar turoperatorlari ishtirokida B2B uchrashuvlar ham tashkil etildi.
Shuningdek, aviakompaniyalar, mehmonxona biznesi va turizm sohasining boshqa vakillari bilan aloqalar yo‘lga qo‘yildi. O‘zbekistonning xalqaro bozorga taklif etayotgan turistik mahsuloti ham kengayib, tarixiy shaharlar bilan birga tog‘, sog‘lomlashtirish, gastronomiya, tabiat va MICE turizmi yo‘nalishlarini ham qamrab olmoqda.
«IFTM Top Resa 2026» ko‘rgazmasida mamlakat milliy stendining yangi konsepsiyasi ham namoyish qilindi. Unda zamonaviy dizayn yog‘och, keramika va muqarnas kabi an’anaviy me’moriy unsurlar bilan uyg‘unlashtirilgan.