Foto: Toshkentda koreyslarning milliy hosil bayrami — Chxusok boʻlib oʻtdi
Toshkentdagi Koreya madaniyati va sanʼati saroyida koreyslarning hosil va oila bayrami — Chxusok nishonlandi. Mehmonlarni anʼanaviy oʻyinlar, mahorat darslari, milliy taomlar taqdim etilgan fudkort va xanbok kiyib suratga tushish uchun fotozona kutib oldi. Kun atmosferasi — «Gazeta» muxbiri Orifjon Xoshimovning fotoreportajida.
Foto: Toshkentda Chxusok — koreyslarning milliy hosil bayrami nishonlandi
Oʻtgan shanba, 26 sentyabr kuni Toshkentdagi Koreys madaniyati va sanʼati saroyida Chxusok — koreyslarning hosil, oila va kattalarga hurmat bayrami boʻlib oʻtdi. Tadbir Oʻzbekiston koreys madaniyat markazlari assotsiatsiyasi tomonidan tashkil etildi.
Uch oʻn yillik davomida bayram shahar miqyosidagi voqeaga aylandi. Koreya Respublikasining Oʻzbekistondagi 1997—2000 yillardagi elchisi Che Yong Xa ilgari Chxusok ancha kamtarona — Koreyslar uyida kichik davrada nishonlanganini taʼkidladi.
«Ishonchim komilki, bu kabi tadbirlar koreys jamiyatimizning yanada jipslashishiga, oʻzligini va birdamligini mustahkamlashga xizmat qiladi. Koreyaning oʻzida Chxusok odatda uyda, oila davrasida nishonlanadi, u yerda bunday ommaviy bayramlar oʻtkazilmaydi. Ammo bu yerda, mintaqa mamlakatlarida bizning koryo-saramlar birdamlikni saqlash va madaniyatni avloddan-avlodga uzatish uchun qanday birlashayotganini koʻrib turibman», — dedi u.
Chxusok mehmonlari bir nechta anʼanaviy oʻyinlarda oʻzlarini sinab koʻrishlari mumkin edi: tuxonori oʻyinida tor idishga kamon oʻqlarini otish, penʼi girgirogʻini aylantirish, penʼichigida bellashish, takchichigi qarta oʻyinini yoki fishkalarni uloqtirish orqali konginori oʻynash. Navarasining konginori oʻyinini kuzatib turgan tomoshabinlardan biri uning bolaligida hech qanday maxsus fishkalar boʻlmaganini — bolalar oddiy toshlar bilan oʻynaganini payqadi.
Koʻngillilar dalgona — shakarli sotalar tayyorlayotgan stol atrofida navbat paydo boʻldi. Mehmonlarga nafaqat shirinlik ulashildi, balki unda qolip yordamida shakl kesib olish ham oʻrgatildi. Koʻngillilarning soʻzlariga koʻra, buni uyda ham takrorlash qiyin emas. Qoʻshni mahorat darsi ishtirokchilariga esa kimpab oʻrash oʻrgatildi.
Fudkortda mahalliy shoxobchalar hozirda Koreyaning oʻzida ommabop boʻlgan koʻcha taomlarini taklif qilishdi: punopan, pishloqli medalonlar, korndoglar, ttokpokki, ramyon va trenddagi desertlar.
Shayvonli hovuz boʻyida xanbok milliy libosini ijaraga olish va suv fonida suratga tushish imkoniyati mavjud edi. Yaqin atrofdagi yarmarkada esa koreys sneklari va kosmetikasi sotildi.