Firibgarlik uchun qidiruvda boʻlgan oʻzbekistonlik Rossiyadan vataniga qaytarildi
Firibgarlik uchun qidiruvda boʻlgan oʻzbekistonlik Rossiyadan vataniga qaytarildi
Rossiyada tergovdan yashirinib yurgan erkak Oʻzbekistonga olib kelindi va huquqni muhofaza qilish organlari xodimlariga topshirildi. U firibgarlik ishi boʻyicha qidiruvda boʻlgan.
35 yoshli erkakning qoʻlga olingani haqida Buxoro viloyati IIB maʼlum qildi.
Huquq-tartibot idoralari maʼlumotlariga koʻra, Peshku tumani "Sadir" mahallasida yashovchi erkak tergovdan yashiringan. Qidiruv joriy yilning 27 avgustida eʼlon qilingan edi.
Jinoyat ishi firibgarlik uchun javobgarlikni nazarda tutuvchi 168-moddaning 1-qismi bilan bogʻliq.
Tezkor-qidiruv tadbirlari davomida qidiruvda boʻlgan shaxs Sankt-Peterburg shahrida ekani aniqlandi. U Rossiya hududida ushlanib, Oʻzbekistonga qaytarilishi taʼminlandi.
Yetib kelganidan soʻng u qoʻlga olindi va Peshku tumani IIB huzuridagi tergov guruhiga topshirildi.
Oldinroq Gruziyadan Oʻzbekistonga juda koʻp miqdorda firibgarlik qilishda ayblanayotgan fuqaro olib kelingan edi. U Interpol liniyasi boʻyicha xalqaro qidiruvda boʻlgan.