Fargʻona turk tadbirkorlari bilan yangi loyihalarni muhokama qildi

Fargʻona turkiyalik tadbirkorlar bilan yangi loyihalarni muhokama qildi

Fargʻona viloyati sopolchilik, hunarmandchilik va turizm sohalarida turkiyalik tadbirkorlar bilan hamkorlikni kengaytirishni rejalashtirmoqda.

Viloyat hokimi Xayrullo Bozorov Turkiyaning «Kası Cini Seramik» kompaniyasi rahbari Husamettin Sabri va «Yasin Çelik Collection» kompaniyasi rahbari Yasin Chelik bilan uchrashuv oʻtkazdi.

Muzokaralar davomida tomonlar Fargʻona viloyati va turkiyalik tadbirkorlar oʻrtasidagi ishbilarmonlik aloqalarini yanada rivojlantirish, shuningdek, oʻzaro manfaatli va istiqbolli loyihalarni amalga oshirishni koʻrib chiqdilar.

Husamettin Sabri ajdodlarining vatani boʻlmish Oʻzbekistonga boʻlgan cheksiz hurmati va mehrini izhor etdi. U mamlakat rivojiga hissa qoʻshish istagini taʼkidlab, Fargʻona viloyatida amalga oshirilishi mumkin boʻlgan bir qator loyiha va tashabbuslarni taqdim etdi.

Asosiy yoʻnalishlardan biri Rishton sopolchilik maktabining boy anʼanalarini Turkiyaning zamonaviy dizaynerlik yechimlari va texnologiyalari bilan birlashtirish boʻldi.

Xususan, tomonlar sopolchilik sohasida mahorat maktabi va galereya tashkil etish, mahalliy hunarmandlar bilan hamkorlikni yoʻlga qoʻyish, shuningdek, turizm sohasida yangi loyihalarni amalga oshirish imkoniyatlarini muhokama qildilar.

Xayrullo Bozorov taklif etilgan tashabbuslarni qoʻllab-quvvatladi va viloyat hokimligi mavjud imkoniyatlarni oʻrganish hamda istiqbolli loyihalarni amalga oshirishda zarur amaliy yordam koʻrsatishga tayyorligini taʼkidladi.

Uchrashuv yakunlari boʻyicha taqdim etilgan takliflarni masʼul shaxslar bilan birgalikda batafsil ishlab chiqish, shuningdek, loyihalarni amalga oshirishning tashkiliy va amaliy masalalarini oʻrganish boʻyicha kelishuvga erishildi.

Tashrif dasturi doirasida turkiyalik tadbirkorlar Rishton tumanida boʻldilar.

Ular mahalliy kulol-ustalar faoliyati, Rishton sopolchilik maktabi anʼanalari va mahalliy hunarmandlar tomonidan yaratilayotgan mahsulotlar bilan tanishdilar.

Tumanga tashrif delegatsiyaga mahalliy sopolchilik sanʼatining oʻziga xos xususiyatlari va ushbu sohada kelgusidagi hamkorlik salohiyati bilan bevosita tanishish imkonini berdi.