Fanlar akademiyasi olimlari elektr tarmoqlarida yo‘qotishlarni kamaytirish bo‘yicha tavsiyalar berdi
O‘zbekiston Fanlar akademiyasi Energetika muammolari instituti olimlari va tadqiqotchilari tomonidan Jizzax magistral elektr tarmoqlari filialining 110/10 kV “Chilonzor” podstansiyasida tadqiqotlar o‘tkazildi.
Fanlar akademiyasi mutaxassislari elektr tarmoqlaridagi yo‘qotishlarni qisqartirish bo‘yicha tavsiyalar taqdim etdi.
O‘zbekiston Fanlar akademiyasi Energetika muammolari instituti olimlari va tadqiqotchilari Jizzax magistral elektr tarmoqlari filialiga qarashli 110/10 kV “Chilonzor” podstansiyasida tadqiqotlar o‘tkazdi.
Akademiya matbuot xizmatining ma’lum qilishicha, ushbu tadqiqotlar davomida elektr tarmog‘idagi yo‘qotishlar miqdori, transformatorning yuklanish rejimi, reaktiv quvvat balansining holati va izolyatsiya resursining eskirish darajasi chuqur tahlil qilindi.
"O‘tkazilgan tadqiqotlar natijasida quvvat koeffitsiyenti ko‘rsatkichini me’yoriy darajaga yaqinlashtirish uchun reaktiv quvvatni kompensatsiyalovchi qurilmalarni o‘rnatish, SCADA tizimi orqali masofadan boshqarish va real vaqt rejimida nazorat qilish imkoniyatlarini joriy etish, yuklama grafigini optimallashtirish maqsadida iste’mol profilini raqamli modellashtirish hamda boshqa bir qator ilmiy asoslangan tavsiyalar ishlab chiqildi.
Ushbu ilmiy yechimlarning amaliyotga tatbiq etilishi texnik yo‘qotishlarning sezilarli darajada kamayishiga, elektr ta’minoti ishonchliligining oshishiga va mamlakat energetika xavfsizligini mustahkamlashga qaratilgan davlat siyosatining samarali amalga oshirilishiga xizmat qiladi", — deyiladi xabarda.