Etna vulqoni yuzlab aviareyslarga ta’sir qildi
Italiyaning Sitsiliya orolida Yevropadagi eng faol vulqon - Etnaning navbatdagi otilishi sabab Kataniya aeroporti faoliyati to‘xtatildi. Vulqondan ko‘p miqdorda kul va qizib turgan tog‘ jinslari otilishi yuzlab aviareyslarga ta’sir ko‘rsatgan, parvozlardagi uzilishlar qo‘shni Maltada ham kuzatilmoqda.
Etna vulqonining otilishi yuzlab aviareyslarga ta’sir ko‘rsatdi
Sitsiliyadagi Kataniya aeroporti Etna vulqonining davom etayotgan otilishi tufayli kamida 14-avgust mahalliy vaqt bilan soat 02:00 gacha yopiq qoladi. DPA agentligining xabar berishicha, aeroport faoliyatining to‘xtatilishi yana uzaytirilishi ham mumkin.
Yevropadagi eng faol vulqon hisoblangan Etnaning navbatdagi faollashuvi bir necha kundan beri Sitsiliyadagi aviaqatnovlarga jiddiy ta’sir ko‘rsatmoqda. Yuzlab reyslar jadvaliga o‘zgartish kiritilgan.
Ayrim aviareyslar butunlay bekor qilingan yoki kechiktirilgan. Kataniyaga qo‘nishi kerak bo‘lgan samolyotlarning bir qismi Sitsiliya poytaxti Palermodagi aeroportga, boshqalari esa Komizodagi kichik aeroportga yo‘naltirilgan.
Bu holat oroldagi transport tizimiga ham qo‘shimcha bosim keltirib chiqargan. Yo‘lovchilar muqobil aeroportlarga yetib olishga urinayotgani sabab poyezdlarda odamlar soni keskin ko‘paygan. Shuningdek, ayrim yo‘lovchilar taksi narxlari keskin oshgani haqida xabar bergan.
Etna vulqonining otilishi oqibatlari qo‘shni Malta orolidagi aviaqatnovlarda ham sezilmoqda. Times of Malta nashri ma’lumotiga ko‘ra, 11-avgust kuni Maltada 19 ta aviareys bekor qilingan. 12-avgustda esa yana uchta reys amalga oshirilmagan, bir qator boshqa parvozlar kechiktirilgan.
Etna vulqoni juma kunidan buyon katta miqdorda vulqon kuli va qizib turgan tog‘ jinslarini havoga otmoqda.
Italiya Milliy geofizika va vulqonshunoslik instituti (INGV) ma’lumotiga ko‘ra, kuchli lava oqimlari dengiz sathidan 2360 va 2750 metr balandlikda joylashgan ikkita og‘izdan oqib chiqmoqda. Keyinchalik yana ikkita yangi lava oqimi paydo bo‘lgan.
Vulqon kuli aviatsiya uchun alohida xavf tug‘diradi. U havoga ko‘tarilganda samolyotlar harakati cheklanishi, reyslar bekor qilinishi yoki boshqa aeroportlarga yo‘naltirilishi mumkin. Shu sabab Kataniya aeroportidagi vaziyat vulqon faolligi va kul tarqalishiga qarab baholanmoqda.
Etna Yevropadagi eng faol vulqon bo‘lib, u bir yil davomida bir necha marta faollashishi mumkin. Uning avvalgi faollik davri iyul oyi boshida kuzatilgan va o‘shanda ham Sitsiliyada bir qator aviareyslar bekor qilingan edi.