Espi yana «Real»ni qutqardi, «Arsenal»da 16 yoshli vunderkind porlamoqda

Espi yana «Real»ni qutqardi, «Arsenal»da 16 yoshli vunderkind porlamoqda

Angliya ligasi kubogining oʻtgan haftada boʻlib oʻtgan bahslari orasida markaziy uchrashuv sifatida eʼtirof etilgan «Chelsi» va «Lids» bellashuvida muxlislar gol yogʻilishiga guvoh boʻlishgandi (6:3). Bu gal esa hammaning diqqat markazida «Liverpul» va «Tottenhem» oʻrtasidagi toʻqnashuv turdi. Jamoasi bilan APLning dastlabki turida birorta gʻalabaga erisha olmagan (birorta gol ham urmagan) Roberto De Dzerbi bu uchrashuvga deyarli asosiy tarkibni tushirdi. «Shporlar» inqirozli vaziyatdan chiqishi kerak, buning uchun esa natijalarni yaxshilash talab etiladi.

Oʻyin boshida har ikki jamoada bittadan yaxshi imkoniyat yuzaga keldi. Avval Bergvall qulay vaziyatdan zarba berdi, biroq boshqa tomonga sakraganiga qaramay, Mamardashvili toʻpni oyoqlari bilan qaytarishga ulgurdi. «Liverpul»da esa Kumas darvozabon bilan yakkama-yakka chiqib bordi, ammo Dubravka bilan duelda yutqazdi. Boʻlim oʻrtalariga kelib esa mezbonlar baribir hisobni ochishdi. Mak Allister rikoshet yordamida toʻpni yuqori burchakka joylashtirdi. U oʻtgan haftada YeChLda «Atletiko» darvozasini ishgʻol etgandi, bu safar esa «Tottenhem» uning qurboniga aylandi.

Tanaffus arafasida Quddus qulay imkoniyatdan foydalana olmadi. Oʻtgan mavsumning ikkinchi qismini ogʻir jarohat sabab oʻtkazib yuborgan va faqat avgust oyiga kelib safga qaytgan ganalik futbolchi darvozabon hududida turib, toʻpni yuqoriga tepib yubordi.

Ikkinchi boʻlim boshida «Liverpul» hisobdagi ustunlikni oshirdi. Mak Allisterdan toʻpni qabul qilib olgan Gakpo uzoq burchakni aniq nishonga oldi. Shundan keyingina burchak zarbasi paytida darvozabon xatosidan foydalangan Gallaher bitta javob golini urdi. Natijada «Enfild»da toʻplangan muxlislar oʻyin oxirigacha xavotirda qolishdi. 84-daqiqada Dominik Soboslai darvozabon bilan yakkama-yakka vaziyatdan foydalana olmadi, 87-daqiqada esa Marmush yaqin masofadan darvozani oʻqqa tutdi, ammo Mamardashvili mezbonlarni muqarrar goldan qutqarib qoldi. Keyingi daqiqalarda londonliklar yana bir necha xavfli hujum uyushtirishdi, biroq hisobni tenglashtira olishmadi. Qoʻshimcha daqiqalarda esa Soboslai oʻz xatosini yuvdi va oʻzi uchun uzoq masofadan gol urish osonroq ekanini yana bir bor koʻrsatib, uchrashuvga yakun yasadi. Uning zarbasidan soʻng toʻp avval toʻsinga tegib, keyin darvoza toʻriga borib tushdi. «Liverpul» Liga kubogi 1/8 finaliga yoʻl oldi, yozda transferlarga qariyb 400 million yevro sarflagan «Tottenhem» esa mavsumdagi uchinchi magʻlubiyatini qabul qilib oldi.