Eshkakchilar Oʻzbekiston hisobiga yana bitta oltin qoʻshib qoʻydi
Oʻzbekiston delegatsiyasi oʻz hisobidagi oltinlar sonini 3 taga yetkazdi va umumiy reytingda 8-oʻringa koʻtarildi.
Eshkakchilar Oʻzbekiston hisobiga yana bir oltin medal qoʻshdi
Oʻzbekiston eshkakchilar jamoasi Osiyo oʻyinlarida yuqori natijalar ko‘rsatishda davom etmoqda.
Akademik eshkak eshuvchilar Shahzod Nurmatov va Sobirjon Safaraliyev Osiyo oʻyinlarining yengil vaznli sportchilar juftligi (LM2x) bahslarida qatnashib, marraga birinchi boʻlib yetib kelishdi va oltin medalni qoʻlga kiritishdi.
Maʼlumot uchun, bu juftlik joriy yilgi jahon chempionatida ham gʻolib chiqqan edi.
Bu eshkak eshuvchilar bugun qoʻlga kiritgan toʻqqizinchi medal boʻldi: bungacha 1 ta oltin, 5 ta kumush va 2 ta bronza olingan edi.
Shu tariqa, Oʻzbekiston delegatsiyasi umumiy reytingda 3 ta oltin, 9 ta kumush va 7 ta bronza bilan 8-oʻringa koʻtarildi.