Eronda o‘zini zo‘ravonlikdan himoya qilgan 24 yoshli ayol qatl etildi — OAV

Eron OAV xabarlariga ko‘ra, 24 yoshli Marziya Nayeri 8-avgust kuni Qazvin markaziy qamoqxonasida qatl etildi. U erini qasddan o‘ldirganlikda ayblanib, o‘lim jazosiga hukm qilingan edi.

Eron qarshilik ko‘rsatish milliy kengashi Ayollar qo‘mitasi inson huquqlari faollariga tayanib xabar berishicha, olti yil avval, 17 yoshida Marziya oilasi tomonidan majburan turmushga berilgan. Ma’lumotlarga ko‘ra, uning eri Dovud ikki sherigi bilan ko‘chmas mulk biznesida hamkorlik qilgan va uyida tez-tez giyohvand moddalar hamda alkogol iste’mol qilgan.

Besh yil avval, oktyabr oyi boshida, 18 yoshli Marziya erining va uning biznes hamkorining jinsiy zo‘ravonlik qilishga urinishidan o‘zini himoya qilgani aytilmoqda. Nayeri o‘zini himoya qilish maqsadida ularga oshxona pichog‘i bilan zarba bergan, natijada uning eri halok bo‘lgan.

Sud jarayonida Marziya eri va uning sheriklari tomonidan ilgari ham bir necha bor jinsiy zo‘ravonlik bilan tahdid qilinganini qasam ichib ma’lum qilgan. U voqea sodir bo‘lgan kuni faqat o‘z or-nomusi va hayotini saqlab qolish uchun harakat qilganini ta’kidlagan. Biroq sud uning harakatlarini o‘zini himoya qilish deb topmadi. Eron rasmiy va davlat ommaviy axborot vositalari qatl haqida hech qanday xabar bermadi.

Eron qarshilik ko‘rsatish milliy kengashining Ayollar qo‘mitasi ma’lumotlariga ko‘ra, Nayeri 2026-yil boshidan beri mamlakatda qatl etilgan 20-ayol bo‘ldi. Inson huquqlari faollarining ta’kidlashicha, 2007-yildan beri Eronda kamida 348 nafar ayol qatl qilingan.