Eron va AQSh sulhni uzaytirishga kelishib oldi - OAV
Eron TIV kelishuv muddati tugaganini va Tehron unga amal qilish bo‘yicha majburiyat olmaganini bildirgan bir paytda, Al Arabiya Eron va AQSh sulhni uzaytirishga kelishganini xabar qildi.
Eron va Qo‘shma Shtatlar sulh muddatini uzaytirishga kelishib oldi, deb xabar berdi 17-avgust kuni Al Arabiya telekanali o‘z manbalariga tayanib. Bu kelishuv o‘zaro anglashuv memorandumida belgilangan 60 kunlik sulhni davom ettirishni nazarda tutadi.
Avvalroq Al Jazeera telekanali 17-avgustda tugaydigan, AQSh va Eron o‘rtasidagi harbiy harakatlarni to‘xtatishga qaratilgan anglashuv memorandumini uzaytirishga tomonlarning hech biri tayyor emasligi haqida xabar bergan edi. Eron Tashqi ishlar vaziri Abbos Aroqchi o‘shanda: «Biz hozircha AQSh bilan muzokaralarni qayta boshlash haqida qaror qabul qilmadik», – deya ma’lum qilgan edi.
Al Jazeera xabariga ko‘ra, 17-iyun kuni AQSh prezidenti Donald Tramp va Eron prezidenti Mas’ud Pizishkiyon tomonidan imzolangan ushbu kelishuv Pokiston vositachiligidagi muzokaralar natijasida erishilgan edi. U minglab insonlarning hayotiga zomin bo‘lgan va Fors ko‘rfazidagi savdo faoliyatini, xususan, neft va gaz eksportini izdan chiqargan uch oydan ortiq davom etgan urushga chek qo‘yishi kerak edi.
Memorandumda Eron va AQSh «harbiy harakatlarni zudlik bilan to‘xtatishi» hamda «barcha jabhalarda jangovar harakatlarning to‘liq to‘xtatilishi yakuniy kelishuvni tasdiqlashi» qayd etilgan edi. Hujjatda yakuniy kelishuv BMT Xavfsizlik Kengashi tomonidan ma’qullanishi va ko‘pi bilan 60 kun ichida tuzilishi kerakligi, bu muddat o‘zaro kelishuvga binoan uzaytirilishi mumkinligi belgilangan edi.
Biroq, Eron TIV rasmiy vakili Ismoil Baqoiy 17-avgust kuni Vashingtonning qoidabuzarliklari tufayli memorandum o‘z kuchini yo‘qotganini ma’lum qildi. Mehr agentligi Baqoiyning brifingdagi so‘zlaridan iqtibos keltirib, «AQSh anglashuv memorandumini boshidanoq buzib kelgan», – deya xabar berdi.
Diplomatning so‘zlariga ko‘ra, anglashuv memorandumi matnida «60 kunlik muddatni belgilovchi band bo‘lmagan». Uning tushuntirishicha, hujjatda faqat 60 kun davomida yadroviy mavzuda muzokaralar o‘tkazish ko‘zda tutilgan xolos. Baqoiy Eron biror bir muddat majburiyati ostida emas, balki o‘z milliy manfaatlari va mulohazalaridan kelib chiqib qaror qabul qilishini ta’kidladi.