Eron Fransiya diplomatlarini mamlakatga kiritishdan bosh tortdi
Eron Fransiya elchixonasining ikki diplomatiga mamlakatga qaytishni taqiqladi. Bu haqda Reuters 17-avgust kuni xabar berdi. Ularning iyul oyida yuzaga kelgan diplomatik kelishmovchilikka aloqadorligi aytilmoqda.
Eron Tashqi ishlar vazirligi matbuot kotibi Ismoil Baqoiyning so‘zlariga ko‘ra, ushbu diplomatlar Vena konvensiyasini buzgan. Vena konvensiyasi diplomatik missiyalarning qoidalari va imtiyozlarini belgilaydi. Baqoiyning ta’kidlashicha, xodimlar Eron fuqarolik jamiyatini qo‘llab-quvvatlashga qaratilgan faoliyat bilan shug‘ullangan.
"Ushbu shaxslar fuqarolik jamiyatini qo‘llab-quvvatlash bilan shug‘ullanganini ta’kidlashning o‘zi Vena konvensiyasi buzilganini tan olishdir", dedi Baqoiy haftalik matbuot anjumanida.
U bu masalaga batafsil to‘xtalmadi. Tehron G‘arb davlatlarining ichki ishlarga aralashuviga doimo salbiy munosabatda bo‘lib kelgan. Ayniqsa, fevral oyi oxirida AQSh va Isroil Eronga hujum boshlaganidan beri vaziyat yanada keskinlashgan. Bu urush hali ham davom etmoqda.
Fransiya tashqi ishlar vaziri Jan-Noel Barro iyul oyida France Inter radiostansiyasiga bergan intervyusida ikki xodimning vazifasi Eron fuqarolik jamiyati, talabalar va san’atkorlarni qo‘llab-quvvatlash dasturlarini rivojlantirish bo‘lganini aytgan edi.
"Fransiya dunyoda Eron fuqarolik jamiyati uchun eng ko‘p ish qiladigan mamlakatlardan biridir. Biz buning evaziga badal to‘ladik", degan edi vazir.
Fransiya 21-iyul kuni Eronning muvaqqat ishlar vakilini chaqirtirgan. Bunga Eron xavfsizlik kuchlarining Tehrondagi elchixona xodimlarini hibsga olgani va ularga nisbatan jismoniy tazyiq o‘tkazgani sabab bo‘lgan.
Avvalroq Ruminiya havo hududining buzilishi sabab Rossiya diplomatini haydab yuborgani haqida xabar berilgandi. Sababi bu voqeadan oldin mamlakatga uchta dron kirib kelgan va Buxarest bu voqealarda Rossiyani ayblagan.